Франция бош вазири истеъфога чиқди

Франция бош вазири Эдуард Филипп истеъфога чиқди, деб хабар бермоқда Reuters. У янги ҳукумат тайинлангунига қадар вазифасини бажаришда давом этади.

Эдуард Франция ҳукуматига 2017 йилнинг 15 майидан буён раҳбарлик қилиб келаётган эди. Қайд этилишича, унинг ўзи истеъфога чиқишга қарор қилган, Франция президенти Эммануэль Макрон унинг истеъфосини қабул қилган.

Филиппнинг истеъфоси Макроннинг «Олға, Республика!» партиясининг 28 июнь куни бўлиб ўтган ҳудудий сайловларда муваффақиятсиз натижаси фонида юз берди.

Президент партияси етакчи лавозимларни эгаллай олмаган, ягона катта муваффақият Гавр мэри лавозимини сақлаб қолишга муваффақ бўлган айнан Эдуард Филипп билан боғлиқ. Франция конституциясига кўра, Филипп мэр лавозимига номзодни таклиф қилиши, ўзи эса ҳукумат раҳбари сифатида ишлашда давом этиши мумкин эди.

Politico’нинг ёзишича, Макрон Филиппни бош вазир лавозимидан олиб ташламоқчи бўлган, аммо унинг Гаврдаги ғалабаси вазиятни мураккаблаштирган. Июнь ойида ўтказилган сўровномага кўра, францияликларнинг 43 фоизи Филиппнинг бош вазир лавозимида фаолиятини давом эттириши тарафдори, 33 фоизи эса унинг истеъфога чиқишини хоҳлайди.

Қайд этилишича, Франция президенти аппарати «янги бош вазир яқин соатларда тайинланиши»ни маълум қилган. Шу билан бирга, Le Mond’нинг ёзишича, Макрон Филиппни ушбу лавозимга қайта тайинланишига ҳеч нарса тўсқинлик қилмайди, бироқ Reuters’нинг аниқлаштиришича, уни қайта тайинлаш масаласи кўриб чиқилмаяпти.