Коронавирус пандемияси сабаб жорий қилинган карантин тартиби етказиб бериш хизматига бўлган талабнинг ортишига олиб келганди, энди ушбу кўрсаткич аста-секин аввалги ҳолатига қайтмоқда. Spot нашри бу ҳақда ушбу хизматларни кўрсатувчи тадбиркорлик субъектларининг вакилларининг фикрлари билан ўртоқлашган.
LeBazar таъсисчиларидан бири Зоҳид Ўлмасбоев талабнинг камайишига карантин чекловларининг юмшатилгани сабаб бўлганини қайд этган.
«Апрель билан таққослаганда буюртмалар сони 1,5-2 бараварга камайгани сезилмоқда, лекин ўртача чек икки баравар ўсган. Бизнинг хизматлардан фойдаланувчи доимий мижозларнинг истеъмол одатлари ўзгармаган, улар ҳали ҳам сервисдан фойдаланмоқда ва ҳафталик буюртмалар беришда давом этмоқда», — дейди тадбиркор.
Карантин бошланганидан бери компания 200 нафарга яқин янги ходимни ишга жалб қилган. Улар, асосан, ўзини яккалаш тартибига ўтган талабалар ёки бошқа компанияларнинг вакиллари.
«Биз ҳам, вақтинчалик ходимлар ҳам ишга қабул қилиш карантин даври учун эканини яхши тушунардик», — деган Зоҳид Ўлмасбоев.
«Arba.uz» директори Гавҳар Акромова карантин чекловлари юмшатилганидан кейин буюртмалар сони 35 фоизга қисқарганини маълум қилган, бироқ харид саватчаси икки баравар ошганини маълум қилди.
«Ҳозир узоқ давом этган ўзини яккалаш тартибидан кейин ҳамма сайрга чиқмоқда, натижада хизматларимизга бўлган талаб қисқарган, лекин истеъмолчилар сервиснинг қулайлигини кўришди, яъни бунда навбатлар ва оғир юклар каби қийинчиликлар йўқлигини тушунишди. Шу сабабли ҳозир хизматларни кенгайтиришга эътибор қаратяпмиз», — дейди «Arba.uz» директори.
Карантин даврида компаниядаги ходимлар сони 20 нафарга кўпайган ва раҳбарият уларни қисқартирмасликка қарор қилган.
«Биз учун истеъмолчининг ўз буюртмасини тезда ва сифатли олиши муҳим, шунинг учун ҳам қўшимча янги ходимларни ишга олдик. Улар ва омборга ишга олинган ходимларнинг ҳаммаси ўз жойида қолади. Ҳа, ҳозир аввалгидек савдо оқими йўқ, лекин иш ҳаммага етмоқда», — дейди тадбиркор.
МyТaxi ҳамда Express 24 асосчиси Акмал Файзиев озиқ-овқат маҳсулотларини етказиб бериш хизматларига талабнинг ошганига қарамай, маркетплейсда 5-10 фоизлик қисқариш кузатилгани, тайёр овқатга бўлган талаб босқичма-босқич ўсиб бораётганини таъкидлади.
Bringo асосчиси Шарофиддин Нуриддинов тушлик вақтидаги буюртмалар 20 фоизга кўпайганини билдирди, шунинг учун компания курьерлар сонини оширган.
Изоҳ (0)