Қарши туман кенгаши депутати: «Сиз журналистлар нотўғри хабар тарқатиб, ҳокимиятга ишончсизлик уйғотяпсиз».

Қарши туман ҳокимлиги ахборот хизмати хабарига кўра, Халқ депутатлари туман кенгашининг олтинчи чақириқ, ўнинчи сессиясида журналистлар ва ижтимоий тармоқ фойдаланувчиларининг танобини тортиб қўйиш масаласи ҳам муҳокама қилинган.

«Сессия ишида жамиятимизда бироз оғриқ нуқтага айланган оммавий ахборот воситалари ва ижтимоий тармоқларда асосланмаган хабарларни тарқатиш, ҳокимият вакиллик органлари қадр-қиммати, шаънини қадрсизлантириш, фаолиятларига нотўғри баҳо бериш каби салбий иллатлар ҳақида туман кенгаши депутатларининг фикри тингланди. Мазкур ҳолатларга йўл қўймаслик, қайси ижтимоий тармоқ бўлишидан қатъи назар, қонун олдида жавобгарлиги борлиги эслатиб ўтилди. Адлия бўлими ва Халқ депутатлари туман кенгашининг доимий комиссияси томонидан қонунларда белгиланган тартибда муносабат билдириб бориш, прокуратура органи томонидан ҳуқуқий баҳо бериш ҳамда жавобгарлигини таъминлаш вазифалари белгилаб олинди», — дейилади ҳокимлик ахборот хизмати тарқатган хабарда.

Сессия ишида иштирок этган депутат Феруза Аҳмедова «Дарё» мухбири билан суҳбати давомида суд ишини ёритган журналистларни халқ маънавиятига таъсир қилиш ва ҳокимиятга нисбатан ишончсизлик уйғотишда айблади.

«Sulton Тех Group ишини пиар қилдинглар, сизларга шу керак эди-да, — дейди депутат Феруза Аҳмедова. — Сиз журналистлар нотўғри хабар тарқатиб, халқ маънавиятига таъсир қиляпсизлар, ҳокимиятга ишончсизлик уйғотяпсизлар».

Мухбир депутатдан суд жараёнида ёритилган хабарларнинг қайси бири хато эканлигини сўради.

«Ҳоким кластер фаолиятига аралашяпти, пул сўраяпти, Акром Арипов қизишди, деб нотўғри хабар беряпсизлар. Аслида ҳоким фермерларнинг қолиб кетган пулини сўраган экан-ку», — дейди депутат Феруза Аҳмедова.

Эслатиб ўтамиз, Қарши тумани ҳокими Мақсуда Мустафоева бош вазир ўринбосари Ўктам Барноев ҳамда Қашқадарё ҳокими Зоир Мирзаевга ёзган хатида кластер раҳбари комбайнлар таъмири ва ғалла ҳосилдорлигини ошириш учун берилиши лозим бўлган 5 миллиард 636 миллион сўм пулни тўлаб бермаётганини ёзганди. Ҳоким ўринбосари Акром Арипов эса ҳоким билан бирга кластер раҳбари Нурбек Эргашев ёнига бориб, шу пулни беришини сўраганини тан олганди. Суд мазкур жараёнга муносабат билдирар экан, ҳокимнинг ушбу хатти-ҳаракатини қонунга хилоф деб атаганди.

Сессия ишида иштирок этган депутат Дилором Тилакованинг тан олишича, у суд қароридан бехабар. Суд қарори ҳақида сессияда оғзаки маълумот берилган.

«Интернет сайтлари суд қарорини нотўғри талқин қилди. Масалан қарорда тақиқ қўйилди, аралашмайдиган қилинди (ҳокимнинг кластер фаолиятига аралашуви назарда тутилмоқда — таҳр. изоҳи) дейилмаган дейишди-ку», — дейди депутат.

Таъкидлаш жоизки, кластер ва ҳокимлик ўртасидаги муаммони кўриб чиққан суд Қарши туман ҳокими ва ҳокимлик мансабдор шахсларига кластер фаолиятига аралашиш, унинг 2020 йил учун фермерлар билан тузган шартномасини бекор қилиш ёки ўзгартиришга уринишини тақиқлаб қўйганди.

Дилором Тилакованинг айтишича, сессияда фақатгина кластер фаолиятидан норози фермерлар қатнашган.