Koronavirus pandemiyasi sabab joriy qilingan karantin tartibi yetkazib berish xizmatiga bo‘lgan talabning ortishiga olib kelgandi, endi ushbu ko‘rsatkich asta-sekin avvalgi holatiga qaytmoqda. Spot nashri bu haqda ushbu xizmatlarni ko‘rsatuvchi tadbirkorlik subyektlarining vakillarining fikrlari bilan o‘rtoqlashgan.
LeBazar ta’sischilaridan biri Zohid O‘lmasboyev talabning kamayishiga karantin cheklovlarining yumshatilgani sabab bo‘lganini qayd etgan.
“Aprel bilan taqqoslaganda buyurtmalar soni 1,5-2 baravarga kamaygani sezilmoqda, lekin o‘rtacha chek ikki baravar o‘sgan. Bizning xizmatlardan foydalanuvchi doimiy mijozlarning iste’mol odatlari o‘zgarmagan, ular hali ham servisdan foydalanmoqda va haftalik buyurtmalar berishda davom etmoqda”, — deydi tadbirkor.
Karantin boshlanganidan beri kompaniya 200 nafarga yaqin yangi xodimni ishga jalb qilgan. Ular, asosan, o‘zini yakkalash tartibiga o‘tgan talabalar yoki boshqa kompaniyalarning vakillari.
“Biz ham, vaqtinchalik xodimlar ham ishga qabul qilish karantin davri uchun ekanini yaxshi tushunardik”, — degan Zohid O‘lmasboyev.
“Arba.uz” direktori Gavhar Akromova karantin cheklovlari yumshatilganidan keyin buyurtmalar soni 35 foizga qisqarganini ma’lum qilgan, biroq xarid savatchasi ikki baravar oshganini ma’lum qildi.
“Hozir uzoq davom etgan o‘zini yakkalash tartibidan keyin hamma sayrga chiqmoqda, natijada xizmatlarimizga bo‘lgan talab qisqargan, lekin iste’molchilar servisning qulayligini ko‘rishdi, ya’ni bunda navbatlar va og‘ir yuklar kabi qiyinchiliklar yo‘qligini tushunishdi. Shu sababli hozir xizmatlarni kengaytirishga e’tibor qaratyapmiz”, — deydi “Arba.uz” direktori.
Karantin davrida kompaniyadagi xodimlar soni 20 nafarga ko‘paygan va rahbariyat ularni qisqartirmaslikka qaror qilgan.
“Biz uchun iste’molchining o‘z buyurtmasini tezda va sifatli olishi muhim, shuning uchun ham qo‘shimcha yangi xodimlarni ishga oldik. Ular va omborga ishga olingan xodimlarning hammasi o‘z joyida qoladi. Ha, hozir avvalgidek savdo oqimi yo‘q, lekin ish hammaga yetmoqda”, — deydi tadbirkor.
MyTaxi hamda Express 24 asoschisi Akmal Fayziyev oziq-ovqat mahsulotlarini yetkazib berish xizmatlariga talabning oshganiga qaramay, marketpleysda 5-10 foizlik qisqarish kuzatilgani, tayyor ovqatga bo‘lgan talab bosqichma-bosqich o‘sib borayotganini ta’kidladi.
Bringo asoschisi Sharofiddin Nuriddinov tushlik vaqtidagi buyurtmalar 20 foizga ko‘payganini bildirdi, shuning uchun kompaniya kuryerlar sonini oshirgan.
Mavzuga doir:
Izoh (0)