Тошкентда 19 та янги савдо-кўнгилочар мажмуаси қурилмоқда, уларнинг умумий майдони 774,6 минг квадрат метрга тенг. Бу ҳақда Президент Шавкат Мирзиёев Олмазор туманидаги лойиҳалар билан танишган вақтида бош вазир ўринбосари, инвестициялар ва савдо вазири Сардор Умрзоқов ўз тақдимотида маълум қилган, деб ёзмоқда «Gazeta.uz».
Инвестициялар ва ташқи савдо вазирининг сўзларига кўра, бугунги кунда Тошкентда майдони 569,1 минг квадрат метрга тенг 30 та савдо-кўнгилочар мажмуаси фаолият олиб бормоқда. Тақдимотда яна 19 та савдо-кўнгилочар мажмуасини барпо қилиш орқали умумий майдонни 1,34 миллион квадрат метрга етказиш кўзда тутилгани қайд этилган.
Савдо-кўнгилочар мажмуаси сони 49 тага етказилганидан кейин шаҳарда савдо майдонлари билан таъминланганлик даражаси 1000 аҳолига 448 квадрат метрга етади, дейилган тақдимотда.
2019 йил ноябрда Orient компаниялар гуруҳи MAPIC кўргазмасида тижорат кўчмас мулки потенциалини намойиш этган. Унга кўра, Москвада шаҳар аҳолисининг савдо майдонлари билан таъминлаганлик даражаси 485 квадрат метр, яъни Тошкентдан (45 квадрат метр) 10 баравар кўп, Олмаотада эса 347 квадрат метр, яъни 8 баравар кўплиги маълум қилинганди.
Вазирнинг тақдимотида 2021 йил IV чорагида майдони 80 минг квадрат метрга тенг Chuqursoy савдо ва бизнес-комплекси ҳамда 2020 йил IV чорагида Rivera савдо-кўнгилочар мажмуаси фойдаланишга топширилиши таъкидлаб ўтилган.
Изоҳ (0)