Қамаши тумани ҳокими Шерали Санаев ҳомиладорлар дарёдан замбилда олиб ўтиладиган, жин кўприкдан йиқилганлар эса ногирон бўлиб қолаётган қишлоққа бориб, аҳоли муаммосига қулоқ тутди. Бу ҳақда «Дарё»га туман ҳокимлиги ахборот хизмати маълум қилди.
«Дарё»да эълон қилинган мақолада туманнинг Калтатой қишлоғидаги кўприк муаммоси тилга олиниб, бешта қишлоқ аҳолисини йиллар давомида қийнаб келаётган масалалар ҳақида сўз борганди.
Қамаши туман ҳокимлигининг маълум қилишича, «Довуд» маҳалла фуқаролар йиғини ҳудудидаги Қизилтепа—Лангар—Майданак автомобиль йўлининг Лангар дарёсидан кесиб ўтувчи қисмида кўприкка зарурат борлиги сайёр қабуллар вақтида ҳам маълум бўлган.
«Туман ҳокимининг 2019 йил ноябрь ойида мазкур ҳудудда ўтказилган сайёр қабулида ҳам бу масала кўтарилган эди, — дейилади ҳокимлик муносабатида. — Кўприк қурилишига заруратни ўрганиш давомида қишлоқдаги 70 метрлик янги кўприк барпо этилиши натижасида Довуд, Тўдана, Ханнар, Калтатой, Қоранқул қишлоқларининг 1852 та хонадонидаги 18 550 нафар аҳолини туман маркази билан боғловчи хавфсиз йўналиш бўлиши ойдинлашган».
Шерали Санаев Калтатой қишлоғи оқсоқоллари билан суҳбати давомида кексалар фикрини тинглаб, туман бош меъморига кўприк қурилиши учун уч хил йўналишда лойиҳа тайёрлаш бўйича кўрсатма берган.
«Лойиҳачи ташкилотларга буюртма бердик. Улар Калтатой қишлоғидаги кўприк қурилиши зарур бўлган жойни ўрганиб, таклиф беришини маълум қилишди», — дейди туман бош меъмори Дилшод Ҳакимов.
Таъкидланишича, янги кўприкдан ташқари аҳоли фойдаланиб келаётган осма кўприк ҳолати ҳам ўрганилиб, таъмирлаш ишлари олиб борилиши белгиланган.
Туман ҳокимлиги масъуллари мақолада аҳоли яшовчи ҳудудни ҳам сел ювиб кетаётгани ҳақида фикрга муносабат билдириб, аҳолини дарё қирғоғига яқин жойда уй қуришда айблаган.
«Мақолада ‘Сел дарё қирғоғини ювиб кетиши оқибатида қирғоқ емирилиб, аҳоли уйларига яқинлашиб қолган. Икки-учта хонадон вакиллари селдан қўрққанидан уйларини бузиб олиб, кўчиб кетди. Сел яна 21 та уйга хавф солмоқда’, дейилади. Ўзбекистон Республикасида белгиланган қоидаларга кўра сиғими катта дарё, катта сув омборлари ва бошқа сув ҳавзалари атрофида 100-250 метр масофада қурилиш қилишга рухсат берилган. Фавқулодда вазиятлар мутахассиси ушбу ҳудудда дарёдан 200-250 метр узоқликда қурилиш қилиш мумкинлигини билдирди», — дейилади ҳокимликнинг расмий муносабатида.
Қамаши туман ҳокимлиги кўприк қурилиши бўйича лойиҳа тайёр бўлгач, ҳокимликнинг ижтимоий тармоқлардаги расмий каналларида эълон қилинишини билдирган.
Изоҳ (0)