Аввалроқ 15 март куни соат 5:15 да Uzbekistan Airways’нинг Истанбул—Тошкент рейсида келган Ўзбекистон фуқаросида коронавирус аниқлангани ҳақида хабар берилган эди. Соғлиқни сақлаш вазирлигидан маълум қилишларича, сўнгги таҳлиллар ушбу фуқаронинг худди шу рейсда у билан бирга келган рафиқаси ва яна бир йўловчисига ҳам коронавирус инфекцияси юққанини тасдиқлаган.
«Айни пайтга келиб, ушбу инфекция аниқланган беморлар сони 10 нафарга етди. Вирусология илмий текшириш институти клиникасида даволанаётган ушбу беморларнинг аҳволи ҳозирча қониқарли бўлиб, шифокорлар томонидан стандартлар асосида даволаш муолажалари олиб борилмоқда», — дейилади Соғлиқни сақлаш вазирлиги расмий ахборотида.
Ўзбекистон коронавирус инфекциясига чалиниш билан боғлиқ илк ҳолат 15 март куни тонг соат 6:00 да тасдиқланган эди. Биринчи бемор 11 март куни Франциядан қайтган аёл бўлди. Кейинчалик унинг ўғли, қизи, турмуш ўртоғи, невараси ва яна бир қариндошида ҳам коронавирус инфекцияси аниқлангани маълум қилинди.
Бундан ташқари, 15 март куни тонгда Истанбулдан учиб келган ўзбекистонлик эркакда, шунингдек, 14 март куни тонгда Лондондан учиб келган Ўзбекистон фуқаросида ҳам коронавирус аниқланган. Соғлиқни сақлаш вазирининг маълум қилишича, 16 март ҳолатига 5,6 мингдан ортиқ одам карантинга олинган.
Изоҳ (0)