«Докани олиб, ниқоб тикасиз — бу қийин эмас». Депутат Мақсуда Ворисова — ниқоб танқислиги ҳақида

«Ўзбекистон» телеканалида 16 март куни эфирга узатилган «Муносабат» кўрсатувининг навбатдаги сонида коронавирус ҳақида сўз борди. Унда Олий Мажлис Қонунчилик палатаси депутати Мақсуда Ворисова сўзга чиқиб, ҳимоя воситалари ҳақида гапирди.

Депутатнинг таъкидлашича, киши коронавирусдан ҳимояланиш учун ниқоб тақишга мажбур.

«Уни 10 ёки 20 кун тақмайсиз. Мана, ўзимизда марля (дока) бор. Шундан тикиб олиш мумкин. Уни ҳар уч соатда алмаштириш, совунли сувда ювиб, дазмоллаш керак. Агар битта ниқоб билан кун бўйи юрсак, инфекцияни ниқобга йиғиб оламиз», — деди Мақсуда Ворисова.

«Ниқоб танқислиги бўляпти? Марля оласиз ва тикасиз — бу қийин нарса эмас. Фуқаро коронавирусдан ҳимояланиш учун оддий дока ниқобдан фойдаланиши мумкин. Лекин беморлар билан муомала қиладиган шифокорлар тўлиқ ёпиладиган, респиратор шаклидаги ниқоб тақиши шарт», — деди у.

Аввалроқ Ўзбекистон бош вазири тиббий ниқоблар ва тиббиёт комбинезонларини ишлаб чиқариш ҳажми оширилгани, мамлакатда етарли даражада захира шакллантирилганини таъкидлаган бўлса-да, айрим дорихоналарда тиббиёт ниқоблари сотувда қолмаган.

«Ўзтўқимачиликсаноат» ассоциацияси Ўзбекистонда бир кунда 500 минг дона тиббий ниқоб ишлаб чиқарилаётганини, мамлакатдаги ишлаб чиқариш қувватлари бир кунда тайёрланадиган ниқоблар сонини икки миллион донагача етказиш имконини беришини маълум қилган.