O‘zbekistonda koronavirusga chalinish bilan bog‘liq birinchi holat qayd etildi. 11-mart, chorshanba kuni, Uzbekistan Airways’ning Parij—Toshkent reysi bilan uchib kelgan ayol (uning o‘zi asli oliy toifali shifokor ekani, xususiy tibbiyot muassasasiga ham ega ekani aytilmoqda) 15-martga o‘tar kechasi Respublika Virusologiya institutiga murojaat qilgan (aeroportda tekshiruv vaqtida u sog‘lom chiqqan). Chamasi ikki soatlar o‘tib, tahlil natijalar chiqqan va uning koronavirusga chalingani ma’lum bo‘lgan.

Bemor bilan bir reysda 45 yo‘lovchi bo‘lgan (“Interfaks”ning yozishicha, yana to‘qqiz nafar ekipaj a’zosi ham bor), ularning yarmi chet ellik tranzit yo‘lovchilar (ular Toshkentdan o‘z manzili tomon uchib ketgan). Bosh vazir Abdulla Aripov ishtirokidagi matbuot anjumanida ayolda koronavirus aniqlangach, uning 9 nafar oila a’zosi, shuningdek, reysning O‘zbekistonda qolgan yo‘lovchilari va ular bilan muloqotda bo‘lgan odamlar — jami 150 kishi izolyatsiyaga olingani aytildi.

Koronavirus tarqalishining oldini olish maqsadida O‘zbekiston yopilishga qaror qildi. Bosh vazirning ma’lum qilishicha, 16-martdan boshlab xorijiy davlatlar bilan barcha aviareyslar bekor qilinadi, avtotransport vositasida O‘zbekistonga kirish-chiqish to‘xtatiladi. Temiryo‘l transportining tashqi dunyodan uzilishi uchun qo‘shimcha uch kun muhlat ajratilgan — bu hol Rossiya va boshqa xorijiy davlatlardagi O‘zbekiston poyezdlarining qaytib kelishi bilan bog‘liq.

Shuningdek, O‘zbekiston fuqarolarining chet davlatlarga chiqishi, chet el fuqarolarining O‘zbekistonga kirishi taqiqlandi. Chet davlatlardagi o‘zbekistonliklarning qaytishi uchun shart-sharoit yaratilishi, xususan, charter reyslar yo‘lga qo‘yilishi ma’lum qilindi. 16-martdan so‘ng charter reyslar bilan O‘zbekistonga qaytarilgan vatandoshlar ikki haftalik karantinga joylashtiriladi.

Koronavirus sabab Navro‘z sayillari bekor qilindi, ta’lim muassasalarida ta’til e’lon qilindi. Bosh vazirning ma’lum qilishicha, barcha sport (masalan, Superliga), madaniy (jumladan, konsert) va boshqa tadbirlar, shuningdek, Navro‘z tantanalari va u bilan bog‘liq boshqa ommaviy marosimlar ham bekor qilinadi (lekin to‘ylarni o‘tkazish mumkin). Fuqarolarga odam gavjum bo‘ladigan joylarga borishdan tiyilish tavsiya qilinmoqda. Barcha davlat va nodavlat tashkilotlarga majlislar o‘tkazishni to‘xtatish haqida topshiriq berildi, diniy tashkilotlarga esa hukumat diniy yig‘inlarni to‘xtatib turish iltimosi bilan murojaat qilgan.

Bolalar bog‘chalar, o‘rta maktablar va oliy ta’lim muassasalari (davlatnikimi, xususiymi, farqi yo‘q) karantinga yopiladi. O‘quvchi va talabalarga ikki haftalik — 1 aprelga qadar davom etadigan ta’til beriladi. Agar koronavirus tarqalishi bilan bog‘liq vaziyat og‘irlashadigan bo‘lsa, 1-apreldan so‘ng onlayn yoki televideniye orqali dars mashg‘ulotlarini yo‘lga qo‘yish bo‘yicha chora-tadbirlar ko‘rilmoqda. Ayni vaqtda viloyatlarda istiqomat qiluvchi talabalarga yo‘l xarajati uchun 50 foizgacha chegirmalar berilishi aytildi.

Hukumat narx-navoning asossiz oshirilishiga qarshi kurashishga va’da berdi. Jumladan, karantin vaqtida narx-navoni, ayniqsa, dori-darmon va tibbiyot vositalari narxini asossiz oshirganlarga keskin choralar ko‘riladi, bu jarayonga Bosh prokuratura huzuridagi departament hamda Davlat soliq qo‘mitasi jalb qilinadi. Abdulla Aripovning alohida qayd etishicha, oziq-ovqat va boshqa zaxiralar yetarli darajada g‘amlangan. Dorixonalarda yuz niqoblari taqchilligini to‘xtatish uchun bu mahsulotni ishlab chiqarish 10 barobarga oshiriladi, 16-martdan esa uni eksport qilish to‘xtatiladi.

Abdulla Aripov ko‘rilayotgan choralarni favqulodda holat deb baholamasligini bildirdi. U aholini vahimaga tushmaslikka chaqirib, barcha hududlar koronavirusni tekshirish uchun asbob-uskunalar, test vositalari hamda himoya vositalari bilan ta’minlanganini, bu kabi choralar jahonning barcha mamlakatlarida ko‘rilayotganini ta’kidladi. O‘zida kasallik alomatlarini sezgan fuqarolarga uydan chiqmay, telefon orqali shifokorlar bilan bog‘lanish tavsiya qilindi. Ta’kidlanishicha, 16-martdan 1003 telefoni orqali koronavirus bo‘yicha yagona qo‘llab-quvvatlash tarmog‘i ishga tushadi.

15-mart holatiga ko‘ra, dunyo bo‘yicha 156 mingdan ortiq koronavirus bilan kasallanish holati aniqlangan. Shu kungacha bemorlarning 5833 nafari vafot etgan, salkam 74 ming sog‘aygan. Bugungi kunda koronavirusning asosiy o‘choqlari Xitoy emas, balki Italiya, Eron, Janubiy Koreya, Ispaniya, Germaniya va Fransiya bo‘lib turibdi.