Парламент сайлови ва Янги йил байрамидан кейин бошланган электр таъминотидаги чекловлар Наманган вилоятини ҳам четлаб ўтмади. Буни «Дарё» таҳририяти почтасига келаётган кўплаб мурожаатлар мисолида кўриш мумкин.
Ажабланарли томони, бу мурожаатларнинг катта қисми ҳозирда ИЭС қурилиши олиб борилаётган ва биринчи блоки ишга тушгани айтилаётган Тўрақўрғон туманидан. Жумладан, Ўлмасбек Холмирзаевнинг билдиришича, туманнинг Ахси ҳудудида 5-6 кундан бери кундуз куни умуман электр йўқ. Кечга 3-4 соатга ёқиб берилади ва яна ўчади.
«Бунинг сабаблари нимада? Яна қанча давом этади? Агар муаммо лимитда бўлса, нега қўшни вилоятларда унақа эмас? Ёки Чуст ва Мингбулоқ туманларида нега кўп ўчмайди-ю, айнан Тўрақўрғонга келганда лимит тугайди. 110-линияда 7-8 йилдан бери муаммо. Нима учун шунча йилдан бери таъмирланмайди?», дея савол беради мурожаатчи.
Туманнинг Қатағонсарой қишлоғи «Ўзбекистон» маҳалласидан йўлланган шикоятда электр таъминотида муаммолар, айниқса, аёллар учун қийинчилик туғдираётгани билдирилган. «5 ойлик икки фарзандим бор. Кечаси билан ‘свет’ ўчавериб, тинка-мадоримизни қуритяпти. Бир кунда кундузи тўрт марта, кечаси 5 маротаба ҳам ‘свет’ ўчадими?», дея нолиган исмини ошкор этишни истамаган аёл.
Шунга ўхшаш ҳолатлар Уйчи туманида ҳам кўплаб кузатилмоқда. Ёрқўрғон қишлоғи «Оқтош» маҳалласида яшовчи Маъруфжон Исматовнинг билдиришича, маҳаллада электр бир кунда 6-7 соат бериляпти, холос. Туман электр корхонаси мутасаддилари буни ҳудуд режимга тушгани билан изоҳлаган.
«Режим дегани ‘свет’ бир соат ёниб, бир соат ўчишини англатадими? 20 январь куни эса умуман светофор қилиб ташлашди. 10 дақиқа ёнади, 20 дақиқа ўчади. Бунақа аҳволни анчадан бери кўрмагандик», — дея ажабланади мурожаатчи.
Уйчига туташ Учқўрғон туманидаги Қайқи қишлоғи аҳли ҳам «свет» ҳаддан ортиқ кўп ўчаётганидан нолиган. Бу муаммога ечим топишда ёрдам сўраган.
Янгиқўрғон туманининг Нанай қишлоғи соя-салқин, баҳаволиги туфайли жазирама кунларда водий аҳли дам оладиган гўзал гўшалардан бири. Ёз ойларида бу ердан одам аримайди, уй ижарага олиш учун ҳатто навбат ҳам пайдо бўлади. Нанайликларнинг бахтига энди ҳатто қишда ҳам қишлоқдан одам аримаяпти. Бу ерда ёғган қалин қорни кўриш, таърифи узоқ-узоқларга кетган бешбармоқдан татиб кўриш учун нафақат Наманган, балки қўшни Андижон ва Фарғонадан ҳам меҳмонлар сероб. Афсуски, қишлоқда электр таъминотидаги мунтазам узилишлар романтиканинг белига тепмоқда.
—Сайлов арафасида ва ундан кейин «свет» анча яхши эди. Лекин ҳозир яна эски ҳаммом, эски тос ҳолатига қайтдик. Айниқса, кечки пайт айни овқат маҳали кўп ўчяпти. Шу чекловини кундузга кўчириб, кечалари электр таъминотини бинойидек йўлга қўйса бўлмайдими? Чақалоқли аёллар, оғир касаллари бор хонадонлар, қариялар қийналиб кетди ахир! — дейди нанайлик Нуриддин Миркамалов.
Наманган шаҳридаги 1-кичик туман, 50-уйда яшовчи Маҳмуджон Мамадалиевнинг айтишича, ҳудудда беш йилдан бери марказий иситиш тизими ишламайди, табиий газ босими паст.
—Ягона умидимиз электрдан бўлиб қолди. «Дом» шароитида ўтин-кўмир қилиб бўлмайди, биласиз. Лекин шу «свет» ҳам кунига 2-4 соатлаб ўчиб, одамни хуноб қиляпти. Масалан, 19 январь соат 19:00 атрофида ўчган бўйи ухлаш олдидан— соат 23:30 ларда ёнди. Кўпга келган тўй десангиз, «Навбаҳор» маҳалласининг бир тарафида электр мунтазам бор, биз тарафда эса мана шундай аҳвол, — дейди Маҳмуджон Мамадалиев.
Шаҳарнинг 4-кичик туман «Халқлар дўстлиги» маҳалласидаги «дом»ларда яшовчи аҳолининг шикоят қилишича, бир кунда 15 маротаба электр ўчиб-ёнган ҳолатлар кузатилган. «Телевизор, музлаткич ва совутгичлар ҳам адо бўлди. Буларнинг ҳаққини электр тармоқлари тўлайдими?» дея савол қўйган фуқаролар.
«Дарё» мухбири Азизбек Абдувалиевнинг маълум қилишича, «Наманган ҳудудий электр тармоқлари корхонаси» акциядорлик жамиятида журналист ва блогерлар учун ўтказилган матбуот анжуманида айни шу масалалар асосий мавзуга айланди. Жамият бош директори Жаҳонгир Ризаевга кўра, «Талимаржон» иссиқлик электр станциясининг электр энергияси ишлаб чиқаришга мўлжалланган қурилмасида юзага келган носозлик туфайли вилоятда электр таъминотида узилишлар кузатилмоқда.
—Ҳолатни кўз олдингизга келтириш учун бир рақамни келтирай. Вилоят учун 11 январь куни 14, 3, 12 январь куни 14, 6, 13 январь куни эса 14, 5 миллион киловатт-соат электр энергияси олинган. Агар бу кўрсаткич 16 миллион атрофида бўлса, вилоятда ҳеч қандай муаммо юзага келмайди. 14 январь кунидан ҳолат кескин ўзгарди. Шу куни 13, 8, 15 январь куни 13, 4, 16 январь куни эса 12,5 миллион киловатт-соат электр энергияси олинган. Ўртадаги 2 миллион киловатт-соат фарқ кичикроқ икки туманнинг бир кунлик энергия истеъмоли ахир. Шу учун мурожаатлар кўп бўляпти ва истеъмолчилар бу борада мутлақо ҳақ. Улардан узр сўраймиз, — дейди Жаҳонгир Ризаев.
Бош директорга кўра, мазкур муаммолар, қолаверса, истеъмолчилар ўз ҳақ-ҳуқуқини тўлақонли англаётгани сабабли жамиятга мурожаатлар сони ортиб бормоқда. Жумладан, фуқаролар томонидан 2019 йил давомида «Наманган ҲЭТК» АЖга 3148 та мурожаатлар келиб тушган бўлса, охирги уч кунда 250 дан ортиқ мурожаат олинган.
Журналистлар электр таъминоти корхоналарига қўнғироқ қилиб тушиб бўлмаслиги, «Ишонч телефони» ва Call-марказ ҳам доимо банд эканлиги юзасидан изоҳ сўради. «Балки диспетчерлар безор бўлиб атайин телефонни узиб қўяр?» дея сўраганлар ҳам бўлди.
Ризаевнинг айтишича, бундай ҳолатларга йўл қўймаслик учун вилоятдаги жами 14 та диспетчерлик марказига (11 та туман ва 3 та Наманган шаҳрида) кузатув камералари ўрнатилган. Уларни шахсан ўзи доимий назорат қилиб боради.
Матбуот анжумани давом этаётган пайтда кутилмаган воқеа юз берди. Бу ҳақдаги эълон жамият биноси ташқарисига қўйилгани боис истеъмолчилардан бири тўғри анжуман ўтказилаётган хонага кириб келди ва на журналист, на блогер эканлиги, фуқаролар номидан келганини билдирди. Ўзини Муроджон Болтабоев дея таништирган фуқаро ҳам Тўрақўрғон туманининг «Бураматут» маҳалласидан экан. Ҳудуддаги тармоқни янгилаш ва янги трансформатор ўрнатиш масаласида келгани, маҳаллий аҳоли жуда қийналаётганини билдирди. Унинг муаммоси ечимига 20 январь, душанба кунидан бошлаб киришишга ваъда берилди. Журналист ва блогерлар ҳам бу ваъдага гувоҳ эканликлари, бажарилиши назорат қилинишига ишонтирилди.
Изоҳ (0)