Энергетика вазирлиги «Лукойл» Ўзбекистон гази фойдасининг 90 фоизини олиши ҳақида маълумотга муносабат билдирди

Ижтимоий тармоқларда Россиянинг «Лукойл» компанияси Ўзбекистондаги фаолияти давомида умумий даромаднинг 90 фоизини олиб кетиши ҳақида маълумотлар кенг муҳокамаларга сабаб бўлди, деб ёзмоқда «Kun.uz».

Нашрнинг ёзишича, Ўзбекистон Энергетика вазирлиги матбуот хизмати раҳбари Элмира Бекмуродова бу масалага ойдинлик киритди ҳамда мазкур компания билан қўшма фаолиятга оид маълумотларни берди.

Вазирлик вакилининг маълум қилишича, маҳсулотни тақсимлашни назарда тутувчи икки томонлама тузилган келишувга мувофиқ «Лукойл» ҳамда «Ўзбекнефтегаз»дан иборат инвесторлар консорсиуми ва Ўзбекистон Республикаси ўртасида фойдали маҳсулотларни тақсимлаш 50 фоизга 50 фоиз миқдорда бўлиши белгиланган. Аммо бу шартномада прогрессив шкала ҳам назарда тутилган ва лойиҳа даромадига кўра Ўзбекистон Республикаси улуши 80 фоизгача етиши мумкин.

Қайд этилишича, муҳокамаларга сабаб бўлган 90/10 фоизли тақсимот консорсиум инвесторлари бўлган «Лукойл» ва «Ўзбекнефтегаз» АЖ ўртасидаги ҳиссаларни назарда тутади. Бу даромаддан улар 9 фоиз миқдорида солиқ тўлайди. Таъкидланишича, «Ўзбекнефтегаз» АЖ бу лойиҳада нофаол инвестор ҳисобланиб, молиявий ресурслар жалб қилмаган ва лойиҳани амалга оширишда бевосита иштирок этмайди.

Вазирлик томонидан қайд этилишича, Ўзбекистон Республикаси ғазнасига умумий улушдан (фойдали маҳсулотнинг 50 фоизидан) ташқари фойда солиғи, мажбурий тўловлар ва табиий бойликлардан фойдаланиш учун солиқлар (умумий тушумнинг 30 фоизи миқдорида) ундирилади.

Аввалроқ, Ўзбекистон «Лукойл»дан 2018 йилда етказиб берилган газ учун 600 миллион долларга яқин қарз бўлиб қолгани ҳақида хабар берилган эди.