Тошкент шаҳрида Starbucks қаҳвахоналар тармоғи очилиши мумкин. Мазкур масала Тошкент шаҳар ҳокими Жаҳонгир Ортиқхўжаев ва Alshaya Group компаниясининг минтақавий вакили Ненжи Менхотра ўртасида бўлиб ўтган учрашувда муҳокама қилинди. Бу ҳақда Тошкент шаҳар ҳокимлиги хабар берди.
Маълум қилинишича, учрашув давомида томонлар ўзаро ҳамкорлик масалаларини, хусусан, Тошкентда жаҳонга машҳур Starbucks қаҳвахоналари тармоғини очиш истиқболларини муҳокама қилди.
Компаниянинг минтақавий вакили Ненжи Менхотра Тошкент шаҳри ҳудудида 4 ва 5 юлдузли меҳмонхоналарни қуриш лойиҳасига ҳам катта қизиқиш билдирди.
Қайд этилишича, Alshaya Group яқин беш йилга мўлжалланган демографик ўсиш кўрсаткичларига асосланиб, шаҳар инфратузилмаси ва коммуникацияларини ривожлантириш масаласига ҳам тўхталиб ўтди.
Учрашув натижаларига кўра, компания вакили Starbucks қаҳвахоналари тармоғи ва меҳмонхоналарни очиш лойиҳасини амалга ошириш учун зарурий ҳужжатларни тайёрлаши ҳақида маълумот берди.
Маълумот учун
Alshaya Group чакана франшизанинг етакчи халқаро оператори бўлиб, Яқин Шарқ ва Шимолий Африка, Россия, Туркия ва Европада 90 та истеъмол брендига ҳамда кўчмас мулк, қурилиш, меҳмонхоналар, автомобиль ва умумий савдо соҳасида холдингларга эгалик қилади. Компаниянинг бош офиси Кувайт шаҳрида жойлашган.
Изоҳ (0)