Ўзбекистон ички ишлар вазирлиги Йўл ҳаракат хавфсизлиги бошқармаси 11—20 январь кунлари давомида мамлакат ҳудудида юз берган йўл транспорт ҳодисалари бўйича статистик маълумотларни ошкор этди. Бошқарма 2020 йил бошидан бу борадаги батафсил статистик маълумотларни эълон қилишни йўлга қўйган, деб ёзмоқда «Gazeta.uz».
Бошқарма маълумотларига кўра 10 кун ичида жами 141 ЙТҲ содир этилган, уларда 25 нафар одам ҳалок бўлган ва 148 нафар аҳоли вакили турли даражада тан жароҳатлари олган. Биринчи ўн кунликда жами 107 та ЙТҲ содир этилгани, 35 нафар одам ҳалок бўлгани ва 100 нафар одамнинг турли жароҳатлар олганлиги хабар қилинганди.
Пиёдалар иштирокидаги ЙТҲлар сони 52 тани ташкил қилган ва уларнинг 6 таси болалар иштирокида содир бўлган. 2 та ҳолат бўйича ҳайдовчиларнинг айбдорлиги ва маст ҳолда автотранспорт воситасини бошқаргани аниқланган.
ЙТҲнинг асосий сабаблари:
- йўловчи пиёдани кўрмай қолиш ҳолати — 23;
- пиёдаларнинг белгиланмаган ердан қатнов йўлини кесиб ўтиши — 21;
- қувиб ўтиш қоидаларини бузиш — 14;
- белгиланган ҳаракат тезлигини меъёрдан ошириш — 14;
- ноқулай об-ҳаво шароити — 12;
- ҳаракат вақтида йўналишни кескин ўзгартириш оқибатида — 12;
- пиёдаларнинг йўлни кесиб ўтиши учун етарли шароитнинг яратилмагани туфайли — 8;
- ҳаракатланиш вақтида масофани сақламаслик — 8;
- қарама-қарши йўналишда келаётган ҳайдовчининг кўзига автомобиль фараси ёруғлигининг тушиши ва кўз қамашиши оқибатида — 7;
- светофорнинг тақиқланган қизил чироғида ҳаракатланиш — 6.
Изоҳ (0)