Parlament saylovi va Yangi yil bayramidan keyin boshlangan elektr ta’minotidagi cheklovlar Namangan viloyatini ham chetlab o‘tmadi. Buni “Daryo” tahririyati pochtasiga kelayotgan ko‘plab murojaatlar misolida ko‘rish mumkin.
Ajablanarli tomoni, bu murojaatlarning katta qismi hozirda IES qurilishi olib borilayotgan va birinchi bloki ishga tushgani aytilayotgan To‘raqo‘rg‘on tumanidan. Jumladan, O‘lmasbek Xolmirzayevning bildirishicha, tumanning Axsi hududida 5-6 kundan beri kunduz kuni umuman elektr yo‘q. Kechga 3-4 soatga yoqib beriladi va yana o‘chadi.
“Buning sabablari nimada? Yana qancha davom etadi? Agar muammo limitda bo‘lsa, nega qo‘shni viloyatlarda unaqa emas? Yoki Chust va Mingbuloq tumanlarida nega ko‘p o‘chmaydi-yu, aynan To‘raqo‘rg‘onga kelganda limit tugaydi. 110-liniyada 7-8 yildan beri muammo. Nima uchun shuncha yildan beri ta’mirlanmaydi?”, deya savol beradi murojaatchi.
Tumanning Qatag‘onsaroy qishlog‘i “O‘zbekiston” mahallasidan yo‘llangan shikoyatda elektr ta’minotida muammolar, ayniqsa, ayollar uchun qiyinchilik tug‘dirayotgani bildirilgan. “5 oylik ikki farzandim bor. Kechasi bilan ‘svet’ o‘chaverib, tinka-madorimizni qurityapti. Bir kunda kunduzi to‘rt marta, kechasi 5 marotaba ham ‘svet’ o‘chadimi?”, deya noligan ismini oshkor etishni istamagan ayol.
Shunga o‘xshash holatlar Uychi tumanida ham ko‘plab kuzatilmoqda. Yorqo‘rg‘on qishlog‘i “Oqtosh” mahallasida yashovchi Ma’rufjon Ismatovning bildirishicha, mahallada elektr bir kunda 6-7 soat berilyapti, xolos. Tuman elektr korxonasi mutasaddilari buni hudud rejimga tushgani bilan izohlagan.
“Rejim degani ‘svet’ bir soat yonib, bir soat o‘chishini anglatadimi? 20-yanvar kuni esa umuman svetofor qilib tashlashdi. 10 daqiqa yonadi, 20 daqiqa o‘chadi. Bunaqa ahvolni anchadan beri ko‘rmagandik”, — deya ajablanadi murojaatchi.
Uychiga tutash Uchqo‘rg‘on tumanidagi Qayqi qishlog‘i ahli ham “svet” haddan ortiq ko‘p o‘chayotganidan noligan. Bu muammoga yechim topishda yordam so‘ragan.
Yangiqo‘rg‘on tumanining Nanay qishlog‘i soya-salqin, bahavoligi tufayli jazirama kunlarda vodiy ahli dam oladigan go‘zal go‘shalardan biri. Yoz oylarida bu yerdan odam arimaydi, uy ijaraga olish uchun hatto navbat ham paydo bo‘ladi. Nanayliklarning baxtiga endi hatto qishda ham qishloqdan odam arimayapti. Bu yerda yog‘gan qalin qorni ko‘rish, ta’rifi uzoq-uzoqlarga ketgan beshbarmoqdan tatib ko‘rish uchun nafaqat Namangan, balki qo‘shni Andijon va Farg‘onadan ham mehmonlar serob. Afsuski, qishloqda elektr ta’minotidagi muntazam uzilishlar romantikaning beliga tepmoqda.
—Saylov arafasida va undan keyin “svet” ancha yaxshi edi. Lekin hozir yana eski hammom, eski tos holatiga qaytdik. Ayniqsa, kechki payt ayni ovqat mahali ko‘p o‘chyapti. Shu cheklovini kunduzga ko‘chirib, kechalari elektr ta’minotini binoyidek yo‘lga qo‘ysa bo‘lmaydimi? Chaqaloqli ayollar, og‘ir kasallari bor xonadonlar, qariyalar qiynalib ketdi axir! — deydi nanaylik Nuriddin Mirkamalov.
Namangan shahridagi 1-kichik tuman, 50-uyda yashovchi Mahmudjon Mamadaliyevning aytishicha, hududda besh yildan beri markaziy isitish tizimi ishlamaydi, tabiiy gaz bosimi past.
—Yagona umidimiz elektrdan bo‘lib qoldi. “Dom” sharoitida o‘tin-ko‘mir qilib bo‘lmaydi, bilasiz. Lekin shu “svet” ham kuniga 2-4 soatlab o‘chib, odamni xunob qilyapti. Masalan, 19-yanvar soat 19:00 atrofida o‘chgan bo‘yi uxlash oldidan— soat 23:30 larda yondi. Ko‘pga kelgan to‘y desangiz, “Navbahor” mahallasining bir tarafida elektr muntazam bor, biz tarafda esa mana shunday ahvol, — deydi Mahmudjon Mamadaliyev.
Shaharning 4-kichik tuman “Xalqlar do‘stligi” mahallasidagi “dom”larda yashovchi aholining shikoyat qilishicha, bir kunda 15 marotaba elektr o‘chib-yongan holatlar kuzatilgan. “Televizor, muzlatkich va sovutgichlar ham ado bo‘ldi. Bularning haqqini elektr tarmoqlari to‘laydimi?” deya savol qo‘ygan fuqarolar.
“Daryo” muxbiri Azizbek Abduvaliyevning ma’lum qilishicha, “Namangan hududiy elektr tarmoqlari korxonasi” aksiyadorlik jamiyatida jurnalist va blogerlar uchun o‘tkazilgan matbuot anjumanida ayni shu masalalar asosiy mavzuga aylandi. Jamiyat bosh direktori Jahongir Rizayevga ko‘ra, “Talimarjon” issiqlik elektr stansiyasining elektr energiyasi ishlab chiqarishga mo‘ljallangan qurilmasida yuzaga kelgan nosozlik tufayli viloyatda elektr ta’minotida uzilishlar kuzatilmoqda.
—Holatni ko‘z oldingizga keltirish uchun bir raqamni keltiray. Viloyat uchun 11-yanvar kuni 14, 3, 12-yanvar kuni 14, 6, 13-yanvar kuni esa 14, 5 million kilovatt-soat elektr energiyasi olingan. Agar bu ko‘rsatkich 16 million atrofida bo‘lsa, viloyatda hech qanday muammo yuzaga kelmaydi. 14-yanvar kunidan holat keskin o‘zgardi. Shu kuni 13, 8, 15-yanvar kuni 13, 4, 16-yanvar kuni esa 12,5 million kilovatt-soat elektr energiyasi olingan. O‘rtadagi 2 million kilovatt-soat farq kichikroq ikki tumanning bir kunlik energiya iste’moli axir. Shu uchun murojaatlar ko‘p bo‘lyapti va iste’molchilar bu borada mutlaqo haq. Ulardan uzr so‘raymiz, — deydi Jahongir Rizayev.
Bosh direktorga ko‘ra, mazkur muammolar, qolaversa, iste’molchilar o‘z haq-huquqini to‘laqonli anglayotgani sababli jamiyatga murojaatlar soni ortib bormoqda. Jumladan, fuqarolar tomonidan 2019-yil davomida “Namangan HETK” AJga 3148 ta murojaatlar kelib tushgan bo‘lsa, oxirgi uch kunda 250 dan ortiq murojaat olingan.
Jurnalistlar elektr ta’minoti korxonalariga qo‘ng‘iroq qilib tushib bo‘lmasligi, “Ishonch telefoni” va Call-markaz ham doimo band ekanligi yuzasidan izoh so‘radi. “Balki dispetcherlar bezor bo‘lib atayin telefonni uzib qo‘yar?” deya so‘raganlar ham bo‘ldi.
Rizayevning aytishicha, bunday holatlarga yo‘l qo‘ymaslik uchun viloyatdagi jami 14 ta dispetcherlik markaziga (11 ta tuman va 3 ta Namangan shahrida) kuzatuv kameralari o‘rnatilgan. Ularni shaxsan o‘zi doimiy nazorat qilib boradi.
Matbuot anjumani davom etayotgan paytda kutilmagan voqea yuz berdi. Bu haqdagi e’lon jamiyat binosi tashqarisiga qo‘yilgani bois iste’molchilardan biri to‘g‘ri anjuman o‘tkazilayotgan xonaga kirib keldi va na jurnalist, na bloger ekanligi, fuqarolar nomidan kelganini bildirdi. O‘zini Murodjon Boltaboyev deya tanishtirgan fuqaro ham To‘raqo‘rg‘on tumanining “Buramatut” mahallasidan ekan. Hududdagi tarmoqni yangilash va yangi transformator o‘rnatish masalasida kelgani, mahalliy aholi juda qiynalayotganini bildirdi. Uning muammosi yechimiga 20-yanvar, dushanba kunidan boshlab kirishishga va’da berildi. Jurnalist va blogerlar ham bu va’daga guvoh ekanliklari, bajarilishi nazorat qilinishiga ishontirildi.
Izoh (0)