Фуқароларнинг ўзини ўзи бошқариш органлари фаолиятини мувофиқлаштириш бўйича Республика кенгашида Бош вазир Абдулла Арипов раҳбарлигида йиғилиш ўтказилган. Бу ҳақда кенгаш ахборот хизмати хабар қилган.
21 январда ўтган йиғилишда «Маҳалла» хайрия жамоат фонди раиси лавозимига шу пайтга қадар Фарғона вилояти ички ишлар бошқармаси бошлиғи лавозимида ишлаб келаётган Раҳмат Маматов номзоди тавсия этилди.
Фуқароларнинг ўзини ўзи бошқариш органлари фаолиятини мувофиқлаштириш бўйича Республика кенгаши аъзолари томонидан Кенгаш раисининг биринчи ўринбосари — «Маҳалла» хайрия жамоат фонди раиси лавозимига Раҳмат Маматов номзоди бир овоздан қўллаб-қувватланди.
«Маҳалла» кенгаши собиқ раиси Шавкат Жавлонов энди фаолиятини Ўзбекистон касаба уюшмалари федерацияси раисининг ўринбосари вазифасида давом эттиради.
Эслатиб ўтамиз, 20 январь куни ўтказилган Сенат мажлисида Президент Шавкат Мирзиёев «Маҳалла» кенгаши раҳбари этиб Фарғона вилояти ИИБ бошлиғи Раҳмат Маматов тайинланиши, у кейин сенатор бўлишини маълум қилганди.
«Яқинда ‘Маҳалла’ кенгашининг раҳбарини ҳам алмаштирамиз. Маҳалланинг тизими ҳам бошқача бўлади, раҳбари ҳам бошқа бўлади. Биз маҳалланинг жамиятдаги ролини кучайтирмоқчимиз. Шу сабабли ‘Маҳалла’ кенгашига ҳам ўзим ишонган одамни олиб келмоқчиман. Фарғона вилояти ИИБ бошлиғини бекорга чақирганим йўқ. У ҳали сизлардек сенатор бўлади», — деганди Президент.
Жавлонов «Маҳалла» кенгашига 2017 йилнинг январидан буён раҳбарлик қилиб келаётганди. Маматов эса 2017 йил октябрь ойида Фарғона вилояти ИИБ бошлиғи лавозимига тайинланганидан буён ИИВ тизимида ишлаб келаётганди.
Изоҳ (0)