Эрдўғон турк ҳарбийларини Ливияга жўнатиш бошланганини эълон қилди

Туркия президенти Ражаб Тоййиб Эрдўғон турк армияси бўлинмалари Ливия томон ҳаракатланишни бошлаганини маълум қилди. Унинг қайд этишича, бу «ҳаракатларни мувофиқлаштириш ва вазият барқарорлиги» учун қилинмоқда.

«У ерга борадиган аскарларимизнинг вазифаси — ҳаракатларни мувофиқлаштириш. Улар у ерда оператив марказ ташкил этишади», — деди Эрдўғон CNN Turk телеканалига берган интервьюсида.

3 январь куни манбалар Туркия Ливияга дастлабки ҳарбийларни яқин икки кун ичида юборишини маълум қилган эди. Куни кеча Туркия парламенти Эрдўғоннинг Ливия Миллий бирдамлик ҳукумати (МБҲ)га ҳарбий ёрдам юбориш ҳақидаги илтимосини маъқуллаган эди.

Шундан сўнг Ливия миллий армияси (ЛМА) фелдмаршали Халифа Хафтар «ташқаридан бўлаётган тажовузга қарши туриш учун» умумий сафарбарлик эълон қилган эди.

Ливияда 2011 йилдан бери давом этаётган фуқаролар урушида МБҲнинг асосий рақиби Халифа Хафтарнинг армияси ҳисобланади. ЛМА кучлари ҳозирда Триполини эгаллаш учун жанговар ҳаракатлар олиб бормоқда.

Декабрь ойи охирида МБҲ Туркиядан расман ҳарбий ёрдам сўраган эди. Ўшанда гап Халифа Хафтар кучларининг Триполига бостириб киришининг олдини олиш учун «ҳаводан, қуруқликдан ва денгиздан» кўрсатиладиган ҳарбий кўмак ҳақида бораётгани айтилган эди.