Ироқ парламенти мамлакат ҳукуматидан 2014 йилги келишувнинг амал қилишини тўхтатиш ҳақида илтимос битилган резолюцияни маъқуллаб овоз берди — ушбу келишув АҚШ ва бошқа мамлакатларга Ироқ ҳудудига ўз қўшинларини жойлаштиришга рухсат берар эди.
Bloomberg’нинг хабар беришича, резолюцияни маъқуллаб парламент мажлисида қатнашган 172 нафар депутатнинг бари овоз берган. Ҳужжат парламентда кўпчилик ўрин эгаси ҳисобланган шиа депутатлар томонидан қўллаб-қувватланган. Айни вақтда салкам 160 нафар депутат, асосан курд ва сунний депутатлар овоз бериш жараёнига келмаган.
Резолюция Ироқ ҳукумати томонидан тасдиқланиши лозим. Бундан ташқари, Associated Press’нинг аниқлик киритишича, ҳужжат ҳақиқатан ҳам тасдиқланадиган бўлса, Ироқдан ўз қўшинларини олиб чиқиб кетиш учун АҚШда бир йил вақт бўлади.
Ироқ парламентидаги ушбу овоз бериш АҚШнинг Бағдодга берган авиазарбасидан сўнг бўлиб ўтди — ушбу авиазарба оқибатида эронлик генерал Қосим Сулаймоний ва ироқлик бир неча нафар юқори мартабали мулозимлар ҳалок бўлган эди.
Ҳозирда Ироқ ҳудудида тахминан 5,2 минг нафар америкалик аскар бўлиб, улар ИШИД террорчилик ташкилотига қарши курашиш мақсадида келган. Америка ҳарбий базалари асосан курдлар ва суннийлар истиқомат қиладиган ҳудудларда жойлашган ва назарий жиҳатдан улар қўшинларни чиқариб юбориш ҳақидаги талабга бўйсунмаслиги мумкин.Мавзуга доир: АҚШ ва Эрон ўртасидаги уруш муқаррарми?
Изоҳ (0)