Андижонлик Х.Қ. ўзини Artel компаниясининг ҳудудий дилери сифатида таништириб, одамларнинг қарийб 100 минг доллар пулини фирибгарлик йўли билан ўзлаштирди. Бу ҳақда Андижон вилояти прокуратураси хабар берди.
Маълум қилинишича, Х.Қ. 2017 йилнинг октябридан 2019 йилнинг августига қадар янги қурилаётган шифохона, меҳмонхоналарга телевизор, кондиционер ва музлаткич етказиб бериш учун пул йиғаётганини, бироқ маблағи етмаётганини айтиб, одамлардан пул олган.
Шу мақсадда аёл саккиз кишининг жами 98 005 долларини фирибгарлик йўли билан қўлга киритиб, шахсий эҳтиёжлари учун сарфлаб юборган.
Мазкур ҳолат юзасидан Андижон вилояти ИИБ ҳузуридаги Тергов бошқармаси томонидан Х.Қ.га нисбатан Жиноят кодексининг 168-моддаси 4-қисми «а» банди билан жиноят иши қўзғатилган.
Ҳозирда мазкур жиноят иши бўйича дастлабки тергов ҳаракатлари давом эттирилмоқда.
Изоҳ (0)