Тошкентда «XXI асрда гендер ва ёшлар масалаларида шерикликни ривожлантириш» мавзусида халқаро форум бўлиб ўтди. Бу ҳақда Ўзбекистон Сенати ахборот хизмати хабар берди.
Қайд этилишича, БМТнинг Барқарор ривожланиш мақсадларидан ўрин олган гендер ва ёшлар масалалари барча мамлакатлар учун ўта долзарб ҳисобланади. Ўзбекистонда сўнгги уч йилда хотин-қизларнинг ижтимоий-сиёсий фаоллигини ошириш, давлат бошқарувидаги иштирокини кенгайтириш борасида муҳим қадамлар қўйилди ва бу борадаги ишлар изчиллик билан давом эттирилмоқда.
Мамлакатда сўнгги йилларда хотин-қизларнинг ҳуқуқ ва манфаатларини ҳар томонлама таъминлашга қаратилган 20 га яқин норматив-ҳуқуқий ҳужжат қабул қилинди. Хусусан, «Хотин-қизлар ва эркаклар учун тенг ҳуқуқ ва имкониятлар кафолатлари тўғрисида»ги ҳамда «Хотин-қизларни тазйиқ ва зўравонликдан ҳимоя қилиш тўғрисида»ги қонунларнинг қабул қилиниши бу борадаги ҳуқуқий асосларни мустаҳкамлади.
Таъкидланишича, хотин-қизлар ва оилалар билан ишлаш тизимини янада мустаҳкамлаш мақсадида Ўзбекистон Республикаси гендер тенгликни таъминлаш масалалари бўйича комиссияси тузилди, Ўзбекистон Республикаси Олий Мажлиси Сенатида алоҳида қўмита ташкил этилди. «Оила» илмий-амалий тадқиқот маркази фаолияти қайта ташкил этилиб, Ҳукумат тузилмаси таркибига киритилди, Ўзбекистон Республикасида оила институтини мустаҳкамлаш концепцияси қабул қилинди.
Сенат раиси Танзила Норбоеванинг сўзларига кўра, хотин-қизлар ва эркаклар ўртасида тенгликни таъминлаш бўйича муҳим қадамлар қўйилмоқда. Жорий йил якунида бўлиб ўтадиган сайловларда Олий Мажлисининг Қонунчилик палатаси депутатлиги учун кўрсатилган 750 нафар номзоднинг 41,3 фоизини хотин-қизлар ташкил этганлиги уларнинг ижтимоий-сиёсий фаоллиги ошаётганлигидан далолат беради.
Изоҳ (0)