Фарғонада автомобилларга газ қуйиш шохобчасида икки километрга чўзилган навбат юзага келгани ҳақида «Дарё» томонидан хабар берилган эди. Фарғона вилояти ИИБ Йўл ҳаракати хавфсизлиги бошқармаси матбуот хизмати мазкур хабарга муносабат билдирди.
Маълум қилинишича, куз-қиш мавсуми бошланиши билан автомобилларга газ тўлдириш шохобчаларида навбатга турган автотранспорт воситаларининг сони ортмоқда. Бунинг асосий сабаб ҳозирги кунда табиий газ босимининг пастлиги ва аҳоли эҳтиёжининг ортганлиги ҳисобланади.
«Фарғона магистрал газ қувурлари» бошқармаси берган маълумотга кўра, бугунги кунда Фарғона вилоятига келувчи магистрал газ тармоқларида белгиланган босим кўрсаткичлари пастлиги сабабли автомобилларга газ қуйиш шохобчаларида сиқилган газ қуйишда бир қатор муаммолар юзага келмоқда. Бу ҳолатни бартараф этиш учун «Фарғона магистрал газ қувурлари» бошқармаси томонидан босимни кўтариш ва бир маромда табиий газ етказиб бериш юзасидан ишлар олиб борилмоқда.
Бу борада бошқарма томонидан 14 ноябрдан буён тўрт марта «Ўзтрансгаз» АЖга мурожаат қилингани айтилмоқда.
Таъкидланишича, автомобилларга газ тўлдириш шохобчалари жойлашган йўлларда юзага келаётган навбатларда турган транспорт воситалари ҳаракатини тартибга солиш, йўл ҳаракати хавфсизлигини таъминлаш бўйича Фарғона вилояти Ички ишлар бошқармаси Йўл ҳаракати хавфсизлиги бошқармаси томонидан махсус чора-тадбирлар ишлаб чиқилиб, шохобчалар яқинидаги йўлларга йўл-патрул инспекторларининг хизмат олиб боришлари ташкил этилмоқда.
Эслатиб ўтамиз, Сирдарёда метан газ қуйиш шохобчаси газ бермаётганидан норози ҳайдовчилар «Тошкент—Гулистон» автомобиль йўлини ёпиб қўйган эди. Нукусда одамлар ҳудудни табиий газ билан таъминлаб беришни талаб қилиб, норозилик намойиши ўтказди.
Изоҳ (0)