Ўзбекистонда 2020 йилдан бошлаб 18 ёшдан 27 ёшгача бўлган йигитлар бир йиллик муддатли ҳарбий хизматга бориши қатъиян белгиланди. Бу ҳақда «Kun.uz» хабар бермоқда.
29 ноябрь, жума куни Ахборот ва оммавий коммуникациялар агентлигида Мудофаа вазирлиги раҳбарияти ва мутасаддилари иштирокида ўтказилган матбуот анжуманида маълум қилинишича, янги йилдан 27 ёшда ҳам бир йиллик ҳарбий хизматга бориш мумкин.
Қайд этилишича, Ўзбекистон Президентининг 2019 йил 22 февралдаги «Ўзбекистон Республикаси фуқароларининг муддатли ҳарбий хизматни ўташ тартибини такомиллаштиришга доир қўшимча чора-тадбирлар тўғрисида»ги қарори билан жорий йилдан муддатли ва сафарбарлик чақирув резервига чақириш, белгиланган хизмат муддатларини ўтаб бўлган муддатли ҳарбий хизматчиларни Қуролли Кучлар резервига бўшатиш тадбирлари февраль—март ойларидан март—апрель ойларига кўчирилди.
Маълум қилинишича, жойлардаги ҳарбий-маъмурий секторлар томонидан Мудофаа вазирлиги билан ҳамкорликда 82 та бино, жумладан, 3 та йиғин, 21 та чақирув пункти ва 58 та мудофаа ишлари бўлими қайта таъмирланган.
2019 йил чақируви учун 100 минг нафарга яқин ёш ўртасида билим ва жисмоний тайёргарлик даражасини аниқлаш бўйича танлов ўтказилиб, улардан 80—85 фоизи муддатли ҳарбий хизматга яроқли деб топилиб, танлаб олинган.
Изоҳ (0)