Зафар Ҳошимов: Билимли мутахассислар етарли эмас, бори ҳам хорижга ишлагани кетишни маъқул кўради

Ўзбекистон Халқ таълими вазирлиги умумтаълим мактабларига ҳомийлик маблағларини жалб қилиш учун шаффоф платформани ишга туширди, дея хабар бермоқда ЎзА.

Ўзбекистонда илк краундфандинг (халқ томонидан молиялаш) платформаси — «Mfond.uz» ўз ишини бошлади. Қайд этишларича, ушбу тизим мактаб раҳбарлари учун ўқув муассасаларининг моддий-техник базасини ривожлантириш учун ҳомийлик маблағларини ишлатишда очиқлик таъминлаб беради.

Мазкур жамғарма орқали ҳомийлар маълум бир таълим даргоҳи ёки умумий жамғарма ҳисобига пул ўтказиб бериши мумкин. Жамғарма ҳисобидан амалий дарсларга мўлжалланган ўқув лабараториялари, ақлли синфлар жиҳозланади. Шунингдек, ўқувчи ва ўқитувчиларининг ижтимоий аҳамиятга эга лойиҳаларини амалга ошириш учун маблағлар йўналтирилади.

Платформанинг тақдимот маросимида сўзга чиққан «Korzinka.uz» супермаркетлар тармоғи Зафар Ҳошимов ҳақиқатдан ҳам Ўзбекистонда таълим сифати талаб даражасида эмаслигини таъкидлаган.

— Ўзбекистонда ҳали ҳам аянчли аҳволдаги мактаблар бор, — дейди Зафар Ҳошимов. — Бугунги кунда мамлакатимизда замон талабларига мос илм ўрганиш тизимини ташкил қилиш зарур. Илгари ота-оналар болаларига яхши ўқиш билан бирга синфда ҳам фаол бўлишни тайинлар эди. Эндиликда ёшларнинг ўз синфида ҳам энг фаоли бўлиши етарли эмас. Чунки ўзаро соғлом рақобатни кучайтириш зарур. Рақобат бор жойда ривожланиш бўлади.

Мамлакат иқтисодиётини кўтариш учун таълимга инвестиция киритиш, тизимни янада ривожлантириш, малакали ўқитувчи-мураббийларни жалб қилиш зарур. Баъзида шундай вазият ҳам бўладики — ўз фаолиятимдан мисол — соҳага билимли мутахассисларни жалб қилолмаяпмиз. Сабаби — улар етарли эмас. Бори ҳам хорижга ишлагани кетишни маъқул кўради. Шу каби масалаларни эътиборга олган ҳолда «Мфонд» жамоатчилик хайрия жамғармасига давомий стипендияни жорий этишни йўлга қўймоқчимиз. Бундан кўзланган мақсад — тизимни тўғри шакллантириш орқали келгусида барча соҳаларга билимли мутахассисларни таъминлаб беришдир.

Бизнинг фарзандларимиз бу ерда 10 кунда олаётган билимига ривожланган мамлакатларда ўқувчилар бир соат вақт сарфламоқда. Ҳозир жойларда сифатли таълим юқори технологиялар асосида жорий этилиши, мамлакатимиз иқтисодиёти кўтарилиши учун, аввало, таълимга алоҳида эътибор кўрсатиш лозим. Юртимиздаги фаол тадбиркорлар ушбу фондни шакллантиришда иштирок этишса, фарзандларимизнинг келажагига пойдевор яратган бўламиз. Бу фонд ўйлайманки, Ўзбекистон келажаги учун муҳим инвестициядир.