25 сентябрь куни соат 21:30 атрофида Сурхондарё вилояти Узун тумани Маландиён маҳалласида яшовчи фуқаро Т.А. ўз уйининг ертўласидан 11 ёшли қизи — Ш.А.нинг тан жароҳатлари бор жасадини топган. Бош прокуратура ахборотига кўра, ушбу жиноятни содир этганликда фуқаро А.Х. (1989 йилда туғилган) гумон қилинмоқда.
Аниқланишича, асли касби уста бўлган А.Х. 25 сентябрь куни қариндошининг уйида таъмирлаш ишларини эрталаб соат тахминан 8:00 да бошлаб, соат 13:00 атрофида бирга ишлаётган икки шериги билан тушлик қилган, улар билан бирга бир шиша ароқ ичган. Шундан сўнг соат тахминан 14:50 атрофида қариндоши Ф.Ш.нинг қўшниси Т.А.нинг яшаш уйига бориб, унинг қизи Ш.А. билан уйининг ертўласида — қизнинг қаршилигига қарамасдан — жинсий алоқада бўлиб, унинг номусига теккан, сўнг қасддан қизни бўғиб ўлдирган.
Мазкур ҳолат юзасидан 26 сентябрь куни Жиноят кодексининг 97-моддаси 2-қисми «в», «з» бандлари («айбдорга аён бўлган ожиз аҳволдаги шахсни номусга тегиш ёки жинсий эҳтиёжни зўрлик ишлатиб ғайритабиий усулда қондириш билан қасддан одам ўлдириш») аломатлари билан жиноят иши қўзғатилган. Маълумот учун, ушбу модда бўйича айбдор деб топилган шахс ё 25 йилгача, ё умрбод озодликдан маҳрум этилади.
«Kun.uz» маълумотига кўра, ушбу жиноят содир бўлган вақтда қизнинг онаси пахта теримида бўлган; отаси эса ишлагани Россияга кетган. «Ўлдирилган қиз тумандаги 6-мактаб ўқувчиси эди», — дейилади хабарда.
Изоҳ (0)