29 сентябрь куни Мудофаа вазирлиги марказий аппаратида 1 октябрь — Ўқитувчи ва мураббийлар куни муносабати билан тантанали тадбир бўлиб ўтди. Бу ҳақда вазирлик матбуот хизмати «Дарё»га маълум қилди.
Тадбирда Ўзбекистон мудофаа вазири, генерал-майор Абдусалом Азизов, вазирликнинг масъул офицерлари, ҳарбий таълим муассасалари ўқитувчилари, ОАВ вакиллари ҳамда эстрада хонандалари иштирок этди.
Байрам муносабати билан ҳарбий кадрларни тайёрлаш, қайта тайёрлаш ва малакасини ошириш йўлида меҳнат қилиб келаётган бир гуруҳ профессор-ўқитувчилар мудофаа вазирининг «Намунали хизматлари учун» кўкрак нишонлари ва эсдалик совғалари, шунингдек пул мукофотлари билан тақдирланди.
«Олий ҳарбий таълим муассасалари ва кичик мутахассисларни тайёрлаш марказида ҳарбий кадрларга ҳарбий соҳа ва ҳарбий санъат ривожидаги асосий тенденцияларни акс эттирадиган, принципиал жиҳатдан янги мутахассислик ва илм-фан йўналишларини, жанговар ҳаракатларни олиб боришнинг хорижий тажрибаси, замонавий шакл ва методларини ҳисобга олган ҳолда билим ва кўникмалар бериш – Қуролли Кучларимиз жанговар салоҳиятини оширишнинг муҳим мезонидир», — дея таъкидлаб ўтди Абдусалом Азизов.
Таъкидлаш жоизки, ҳозирда Мудофаа вазирлиги тизимидаги олий ҳарбий таълим муассасалари, Қуролли Кучлар кичик мутахассисларни тайёрлаш маркази, «Темурбеклар мактаб»лари каби таълим даргоҳларида 800 дан зиёд малакали педагоглар фаолият кўрсатмоқда.
Қуролли Кучлар Марказий ашула ва рақс ансамбли ҳамда эстрадамизнинг ёрқин хонандалари иштирокидаги устозларга аталган концерт дастури байрамга ўзгача кайфият бахш этди.
Изоҳ (0)