Россиянинг Омск шаҳрида Александр Сергеевич Пушкин номидаги давлат вилоят кутубхонаси ва Аҳмад Фарғоний номидаги Фарғона вилоят ахборот-кутубхона маркази ўртасида ўзаро ҳамкорлик келишуви имзоланди. Бу ҳақда «Дарё» мухбири Азизжон Эрматов хабар берди.
Келишув доирасида халқаро ҳужжат, ахборот ва турли кўринишдаги миллий нашрлар алмашуви йўлга қўйилади. Шунингдек, замонавий кутубхона технологияларини ўрганиш ва амалиётга татбиқ этиш бўйича тажриба алмашиш бўйича ҳамкорлик қилиш режалаштирилмоқда.
Аҳмад Фарғоний номидаги Фарғона вилоят ахборот-кутубхона маркази Ўзбекистондаги энг йирик кутубхоналардан биридир. Кутубхона йигирмадан ортиқ тилдаги 316 мингдан зиёд ноёб нашрлар жамғармасига эга. Кутубхона умумий фондининг электрон каталоги ташкил этилган ва у мунтазам бойитиб борилмоқда.
Ҳар йили кутубхонага 250 минг нафарга яқин фойдаланувчи ташриф буюради. Уларга турли ташувчилардаги 500 мингдан зиёд нашрлар берилади.
Ахборот-кутубхона маркази Фарғона вилоятидаги 1600 дан зиёд кутубхоналарни ўз ичига олган 247 АРМ ходимлари учун услубий марказ ҳисобланади.
Изоҳ (0)