Жорий йил 18 сентябрь куни соат 13:40 да Тошкент шаҳрининг Мирзо Улуғбек тумани, Буюк Ипак йўли кўчасида ЙТҲ содир бўлди: автомобиллардан бири пиёдалар учун мўлжалланган йўлакчага ўтиб кетиши оқибатида қўлида ёш боласини кўтариб олган онага енгил тан жароҳати етди. Ижтимоий тармоқларда муҳокамага сабаб бўлган ушбу ҳолат юзасидан Мирзо Улуғбек туман ҳокимлиги матбуот хизмати изоҳ берди.
Туман ҳокимлиги мутасадди раҳбарлари она ва боланинг саломатлигидан хабар олиш мақсадида шифохонага борди. Жабрланувчи Нодира Қодирова ва унинг фарзанди Саидумар Бахтиёров ҳозирда ўзини яхши ҳис қилмоқда.
Шифокор Неъмат Тугаловичнинг таъкидлашича, онага бош мия ёпиқ жароҳати, бош мия чайқалиши, энса соҳаси юмшоқ толаларининг эзилиши, болага бош мия ёпиқ жароҳати, бош мия чайқалиши ташхиси қўйилган. Ҳозирда улар Республика ихтисослаштирилган нейрохирургия илмий-амалий тиббиёт маркази шифокорлари назоратида бўлиб турибди.
ЙТҲни содир этган Mercedes-Benz ҳайдовчисига нисбатан чора кўрилган. Автоулов жарима майдончасига олиб борилган.
Маълумот учун, Нодира Қодирова шу куни икки фарзанди билан бўлган. Мактаб ёшидаги фарзанди соғ-саломат.
Изоҳ (0)