Саудия Арабистони ҳукумати Жаклин Кеннеди яшаган уйни 43 млн долларга сотиб олди

Американинг 35-президенти Жон Кеннедининг рафиқаси ёшлигида яшаган, Виржиния штати шимолида жойлашган ҳашаматли уй Саудия Арабистони ҳукумати томонидан 43 миллион долларга харид қилинди. Бу ҳақда «ТАСС» хабар бермоқда.

Бу Америка ҳудудида хорижий инвесторлар томонидан харид қилинган энг қимматбаҳо уй ҳисобланади.

Саудия Арабистони вакилининг маълум қилишича, «Мерривуд» қасридан мамлакат расмий делегациясини АҚШга расмий ташрифи чоғида жойлаштириш мақсадида фойдаланилади.

«Саудия Арабистони ҳукумати ‘Мерривуд’нинг тарихий аҳамиятини яхши тушунади ва унинг АҚШ тарихидаги ўрнига ҳурмат билан муносабатда бўлади», — дейди қироллик вакили.

Ушбу кўчмас мулкнинг аввалги эгаси America Online компаниясининг асосчиларидан бири Стив Кейс эди. У 2005 йилда ушбу ҳашаматли уйни 24,5 миллион долларга сотиб олган эди. Потомак дарёси соҳилида жойлашган уй 2,3 гектар ер майдонида жойлашган. Бино майдони 2,137 минг квадрат метрни ташкил этади.

АҚШнинг бўлажак биринчи хоними Жаклин Буве бу уйда 1940 йилларда, унинг онаси Standard Oil нефть империяси меросхўрига турмушга чиққан пайтда яшаган. Жаклиннинг турмуш ўртоғи 1963 йилда вафот этган, 1968 йилда эса у юнонистонлик миллиардер Аристотел Онассисга турмушга чиққан. Жаклин 1994 йилда Нью-Йоркда вафот этган.