ИШИД террорчилик ташкилоти ва «Ал-Қоида» ташкилоти ўзаро бирлашиши мумкин. Бу ҳақда Шанхай ҳамкорлик ташкилотининг Минтақавий аксилтеррор тузилмаси қўмитаси ижрочи директори Евгений Сисоев Красноярскда бўлиб ўтган форумда маълум қилди, деб хабар берди «РИА Новости».
«Мавжуд хавфлар орасида ИШИД ҳамда ‘Ал-Қоида’нинг ягона тармоқ сифатида бирлашиш эҳтимоллиги мавжуд бўлиб, бу орқали улар фаол ва яшириниб ётган ячейкалари ёрдамида дунёнинг кўплаб мамлакатларини эгаллаб олиши мумкин», — дейди Сисоев.
Унинг сўзларига кўра, бунга қадар Яқин Шарқда жанг қилган аксарият жангарилар Афғонистонга тўпланган. Уларнинг барчаси ўз фаолиятини давом эттиришга қодир. Бугунги кунда ИШИД ўзининг гуруҳларини Европа, Марказий ва Жануби-Шарқий Осиё, Россияга ташламоқда. Сисоевнинг таъкидлашича, мазкур гуруҳлар йирик шаҳарлардаги нишонларни ихтиёрий танламоқда. Шунингдек, террорчиларнинг тарафдорлари онлайн-машғулотларни ўтамоқда.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)