Нигерия ҳукумати 25 февраль, якшанба куни «Боко ҳарам» жангарилари томонидан Йобе штатида жойлашган Дапчи қишлоғидан 110 нафар мактаб ўқувчиси ўғирлаб кетилганини тасдиқлади. Бу ҳақда France-Presse агентлигига таяниб, «ТАСС» хабар берди.
«Федерал ҳукумат 19 январь куни жангариларнинг таълим муассасасига уюштирган ҳужуми оқибатида ўғирлаб кетилган 110 нафар мактаб ўқувчиси ҳали топилмаганини тасдиқлайди», — дейилади хабарда.
Ўғирлаб кетилган ўқувчилар сони мактаб маъмурияти ва штат ҳукумати томонидан тақдим этилган маълумотлардан сўнг аниқланди.
2014 йилда «Боко ҳарам» жангарилари Чибок шаҳридаги лицейдан 276 нафар қизни ўғирлаб кетган эди. Кейинроқ, уларнинг 57 нафари асирликдан қочишга муваффақ бўлган, 2016 йилнинг октябрида эса яна 20 нафар мактаб ўқувчиси «Қизил Хоч» халқаро қўмитасининг музокалари натижасида озод қилинган. Шунингдек, 2017 йилда 82 нафар қиз озодликка чиқарилган. Бироқ шунга қарамай юз нафарга яқин қиз ҳамон бедарак йўқолганлар сафида қолмоқда.
Изоҳ (0)