Мексикада жойлашган кўлнинг тубидан коинотнинг қадимий модели топилди

Бир гуруҳ археологлар Мексикадаги Истаксиуатль вулқони ёнида жойлашган кўл тубидан қадимий ибодатхонани топди. Тадқиқотчиларнинг сўзларига кўра, ушбу топилма коинотнинг қадимги ацтеклар томонидан яратилган модули ҳисобланади. Бу ҳақда ScienceAlert! порталига таяниб, «РИА Новости» хабар берди.

Объект денгиз сатҳидан 4 минг метр баландликда топилган бўлиб, у турли ўлчамдаги тошлардан қурилган. Олимларнинг таъкидлашича, ибодатхона шундай қурилганки, кўл қирғоғида турган кузатувчида тошлар сув остида эмас, балки унинг юзасида сузиб юргандек тасаввур уйғотади.

«Сув ёрдамида яратилган визуал эффектлар ва унда ишлатилган конструкция элементларининг ўзига хослиги қаршимизда қадимги ацтекларнинг коинот борасидаги тасаввурининг миниатураси турганини кўрсатади», — дейди археолог Ирис Эрнандес.

Эрнандеснинг қайт этишича, моделда дунёнинг яратилиши борасида ацтекларнинг афсоналари тасвирланган. Унга кўра, қадимда қуруқлик бўлмаган. Худолар денгизда яшовчи Сипактли номли денгиз махлуқининг танасидан осмон ва ерни яратган.

Ибодатхонанинг ёши ҳали аниқланмади, бироқ унинг атрофидан топилган предметлар эрамизнинг VIII асрига тегишли эканлиги маълум.