Япония мудофаа вазирлиги КХДР томонидан 29 август, сешанба куни учирилган ракета Тинч океанидаги Америка ҳарбий объектлари жойлашган Гуам ороли ҳудудига етиб боришга қодир, деб ҳисоблайди. Бу ҳақда мудофаа вазири Ицунори Онодэра маълум қилди, деб ёзади «ТАСС».
«Ракета парвозининг максимал узоқлиги 5 минг километрга етиши мумкин. Табиийки, у Гуамгача учиб бора олади», — деди у. Онодэранинг сўзларига кўра, ракетанинг ҳамма бўлаклари Тинч океанида бир жойга қулаган.
Аввалроқ 29 август куни саҳарда учирилган КХДР ракетаси Япониянинг Хоккайдо ороли осмонидан учиб ўтиб, ундан 1180 км нарига, Тинч океанига қулагани хабар берилган эди.
Ракета тахминан 2,7 минг км масофани босиб ўтган, унинг траекторияси баландлиги эса 550 км га етган. Япония мудофаа вазирлиги у ўрта масофага учувчи «Хвасон-12» ракетаси бўлган деб тахмин қилмоқда.
Изоҳ (0)