Кенияда пластик пакетлардан фойдаланганлик учун 4 йиллик қамоқ жазоси жорий этилди

Кенияда парчаланмайдиган пластик пакетлардан фойдаланишни чекловчи дунёдаги энг шафқатсиз қонун кучга кирди. Бу ҳақда Sky News хабар берди.

Тақиқ пакетдан фойдаланиш, уни тайёрлаш ва импорт қилишга қўлланилади. Қонунни бузган жисмоний ва юридик шахсларга 38 минг долларгача жарима ва тўрт йилгача қамоқ жазоси қўлланилади. Истисно фақат саноат мақсадида қоплар ишлаб чиқарувчи компанияларга қўлланилган.

Ҳукумат оғир экологик ҳолат сабабли бундай қаттиқ чора қўллашга мажбур бўлди. Кенияда ҳар йили тахминан 100 миллионта пакет сотилган ёки тарқатилган. Натижада кўплаб шаҳарларнинг кўчалари чиқиндили пакетлар билан тўлиб кетди. Табиий муҳитда пластикнинг емирилиши учун 500 йилдан 1000 йилгача вақт кетади.

Бундан ташқари, океанга катта миқдорда ташланган пакетлар балиқлар, тошбақалар ва қирғоқбўйида яшовчи қушлар ва бошқа ҳайвонларнинг ўлимига сабаб бўлган. «Агар шу тариқа давом этсак, 2050 йилда океанда балиқлардан кўра пластик кўпроқ бўлади», — деб таъкидлаган Кенияда атроф-муҳитни муҳофаза қилиш бўйича БМТ дастури координатори Ҳабиб ал-Ҳабр.

Тақиқ киритилганидан сўнг Кения қонуний даражада пластик пакетлардан фойдаланиш тақиқланган дунёдаги 40-давлатга айланди.