Техаслик талаба қиз Эмбер Катанна Ван Ҳек 119 соат давомида Гранд Канён атрофидаги чўлда қолиб кетди. Қизнинг сўзларига кўра, у Google харитасидаги хато туфайли йўлдан адашган, дея хабар бермоқда TJournal.
Ван Ҳекнинг сўзларига кўра, у ёлғиз ўзи Гранд Канённиг жанубий қисмидан Ҳавасу шаршараси томон автомобилда йўл олган. Йўлда Google’нинг харитаси қизга бошқа йўналишни кўрсатган. У харита кўрсатган йўналиш бўйича ҳаракатланиб, номаълум жойга бориб қолган. Шу вақтда қоронғу туша бошлаган ва GPS сигнали йўқолиб қолган.
Эмбер ваҳимага тушиб, йўл излай бошлаган. Йўлни топган вақтда автомобилининг бензини тугай бошлаган. У номаълум иншоотгача етиб олган ва ўша ерда эрталабгача кутишга қарор қилган. Бироқ шу жойда автомобилнинг захира ёқилғиси ҳам тугагани маълум бўлган.
Чўлда ёлғиз қолиб кетган Эмбер тошлар ёрдамида «SOS» ва «HELP» («Ёрдам») ёзувларини ёза бошлаган. Учинчи куннинг охирига келиб ҳар бир ҳарфнинг узунлиги 6—8 метрга етган.
Талаба қиз олов ёқиб, тутун ёрдамида ўзи ҳақида хабар бермоқчи бўлган, бироқ нарсалар жуда қуруқ бўлгани сабабли, жуда тез ёниб кетган. У ўзи келган йўлга тўсиқ ўрнатишга ҳам мажбур бўлган, чунки бир марта унинг ёнидан катта юк машинаси ўтиб кетган.
Эмберда сув ва егулик билан боғлиқ муаммо бўлмаган. У ўзи билан 20 кунга етадиган озиқ-овқат захирасини олган эди. Бироқ у қутқарувчиларни кутиб жуда чарчаган ва телефон алоқаси бўлиши мумкин бўлган жойгача пиёда етиб олишга қарор қилди. У қарийб 18 километр масофани босиб ўтиб, фавқулодда хизматга қўнғироқ қилишга муваффақ бўлди, аммо улар билан атиги 49 сония гаплаша олган.
Қутқарувчилар уни ҳаводан топади деган умидда қиз машинаси турган жойга қайтиб борган. Қутқарувчилар вертолётда келиб қизни қутқарган ва касалхонага олиб борган. Талаба қиз чўлда қарийб 120 соат вақт ўтказган.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)