Президент Дутерте Филиппин армиясининг наркотикларга қарши курашишига рухсат беради
Филиппин президенти Родриго Дутерте гиёҳванд моддаларнинг ноқонуний айланмасига қарши курашда армия ёрдамидан фойдаланиш тўғрисидаги фармонни имзолашга тайёрлигини маълум қилди. Бу ҳақда «ТАСС» хабар бермоқда.
Аввалроқ мамлакат раҳбарияти ҳуқуқни муҳофаза қилиш органларида кузатилган коррупция ҳолатлари туфайли полициянинг наркотикларни ноқонуний ишлаб чиқариш, сақлаш ва сотишга қарши операцияларини тўхтатиб қўйган эди.
1 февраль куни Филиппин Мудофаа вазирлиги президентдан гиёҳванд моддалар тарқалишини олдини олишда армиянинг ҳам иштирокини таъминловчи, шунингдек, ҳарбийларга ноинсоф полициячиларни ҳибсга олиш ваколатларини тақдим этувчи фармон имзолашни сўраган эди.
Эслатиб ўтамиз, аввалроқ Дутерте ўзининг наркотикларга қарши кураш услубларини танқид қилган руҳонийларни наркотрафикка қарши курашда ўз таъсиридан фойдаланишга чақирган эди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
