Япониянинг Саппоро шаҳри ҳуқуқни муҳофаза қилиш органлари 6 сентябрь, якшанба куни Японияда истиқомат қилувчи Корея фуқаролари лигаси (Чхонрён)га алоқадор ташкилотларнинг идораларида тинтувлар ўтказди. Бу ҳақда «ТАСС» хабар бермоқда.
Тинтувлар фирибгарлик жинояти амалга оширилгани гумони остида ўтказилган. Тергов маълумотларига кўра, Саппородаги Чхонрёнга алоқадор бир неча компания Япония ҳукумати субсидиялари билан фирибгарлик қилган бўлиши мумкин. Хусусан, улар Корея фуқаролари учун мўлжалланган мактаб ўқитувчилари ишсиз қолгани ҳақида ёлғон маълумотларни тақдим этган.
2015 йилнинг май ойида Японияда КХДРдан маҳсулотларни ноқонуний импорт қилиш иши бўйича бир неча киши ҳибсга олинган эди. Қўлга олинганлар орасида Японияда истиқомат қилувчи Корея фуқаролари лигаси раҳбарининг ўғли ҳам бор эди.
Чхонрён Японияда истиқомат қиладиган ва КХДРни қўллаб-қувватлайдиган ва у ерда қариндошлари бўлган кореяликларнинг бир қисмини ўзида бирлаштирган. Токио мазкур ташкилотни қатъий назорат қилиб боради, чунки у разведка фаолияти билан шуғулланади, деган гумон бор. Чхонрён раҳбарияти Пхеньяндаги ҳукумат вакилларидир, ташкилот раҳбари Хо Чон Ман КХДР Олий халқ мажлиси (парламенти) депутатидир.
Изоҳ (0)