Тожикистон президенти Эмомали Раҳмон 6 сентябрь, якшанба куни тонгда Ваҳдат шаҳрига ташриф буюрди — икки кун аввал ушбу шаҳар милиция бўлинмасига қуролли ҳужум уюштирилган эди. Бу ҳақда «News.tj» хабар бермоқда.
Тожикистон президенти матбуот хизмати хабарига кўра, Раҳмон Ваҳдатда 4 сентябрь куни ўққа тутилган ички ишлар бўлими биноси ўрнига қуриладиган янги иморат қурилиши учун тамал тошини қўйган. Шунингдек, Тожикистон президенти қуролли ҳужум натижасида ҳалок бўлган Тожикистон куч тузилмалари зобитлари қариндошлари ва яқинларига ҳамдардлик билдирди.
Раҳмоннинг ваъда қилишича, милиция ва махсус бўлинма ходимларини ўлдирган жиноятчилар ҳибсга олинади ва қонун олдида жавоб беради. Ўз навбатида, Тожикистон президенти жиноятчиларни қўлга олишда Ички ишлар вазирлигига ёрдам кўрсатгани учун Ваҳдат шаҳри аҳолисига миннатдорчилик билдирди.
«Шу муносабат билан, огоҳ бўлиш зарурлигини яна бир бор эслатиб ўтаман. Хусусан, ота-оналар, зиёлилар, шунингдек, жамоат арбоблари болалар тарбиясига жиддийроқ эътибор қаратишлари керак. Ҳаётимизда камчилик ва қийинчиликлар кўп ва биз уларни ҳал қилиш учун биргаликда ҳаракат қилишимиз керак», — дея қайд этди Тожикистон президенти.
Изоҳ (0)