Россия Ташқи ишлар вазирлиги Япония Иккинчи жаҳон уруши якунларини шубҳа остига олмоқда, деб ҳисоблайди. «Echo.msk.ru»нинг Россия ТИВга асосланиб хабар беришича, Япония ҳукуматининг даъволари унинг тарихий ҳақиқат ва уруш хотираларини ҳурмат қилиш ҳақидаги баёнотларига зиддир.
Куни кеча Россия бош вазири Дмитрий Медведевнинг Курилнинг Япония томонидан даъво қилинадиган оролларидан бири — Итурупга ташрифи муносабати билан Япония томони Москвага эътироз билдиргани ҳақида хабарлар берилганди.
Россия Ташқи ишлар вазирлиги бунга жавобан, мамлакат раҳбарияти ва ҳукумат аъзоларининг иш жадвалини тузиб чиқишда Япония томонининг нуқтаи назарини ҳисобга олиш режалаштирилмаётганини маълум қилди.
Медведевнинг ўзи эса Facebook’даги саҳифасида Курил оролларини Осиё—Тинч океани минтақасининг дарвозаси деб атаб, оролларда истиқомат қилаётган аҳоли ҳаётини яхшилаш учун Россия ҳукумати чоралар кўришига ваъда берди.
Изоҳ (0)