Жон Керри синган оёғининг суратини намойиш қилди

АҚШ давлат котиби Жон Керри ўзининг синган оёғи қандай кўринишда эканлигини намойиш қилди. Бостондаги шифохона палатасида олинган сурат Twitter тармоғига жойлаштирилди, деб хабар беради «Nur.kz».

«Операциядан бир ҳафта ўтганидан кейин ўзимни яхши ҳис қиляпман. Сьюзан Райз (АҚШ миллий хавфсизлик хизмати маслаҳатчиси) ва давлат департаментининг юқори мартабали вакиллари билан гаплашиб олдим. Иш давом этмоқда!», — деб Керри сурат остига изоҳ қолдирди.

Расмда давлат котибининг шифохонада ишсиз қолиб кетмаётганига гувоҳ бўлиш мумкин. Керрининг тиззасида ҳужжатлар турибди, сиёсатчининг ўзи эса телефонда суҳбат қуряпти. Шу билан бирга унинг столида ташқи олам билан алоқа учун бир қанча гаджетлар борлигини кўриш мумкин. Давлат котиби жойлашган Бостон касалхонаси палатаси кўпроқ иш кабинетини эслатиб юбормоқда.

Эслатиб ўтамиз, 31 май куни Жон Керри Франциянинг Сьонзе шаҳри яқинида Тур де Франс йўналиши бўйича турнеда велосипеддан йиқилган ва вертолётда Женевадаги касалхоналардан бирига етказилган эди. Шундан сўнг Керри Мадрид ва Парижга ташрифини бекор қилиб, даволанишга АҚШга қайтиб кетди.

Июнь ойи бошида эса унинг синган оёғи операция қилинди.