Туркия бош вазири Аҳмед Давутўғли 9 июнь куни президент Тоййиб Эрдўғонга 7 июнь куни бўлиб ўтган парламент сайловлари муносабати билан ҳукумат истеъфоси тўғрисида арзнома берди, деб ёзади ТАСС.
Янги маҳкама иш бошлаши олдидан техник зарурат ҳисобланган истеъфони президент қабул қилди.
«Президент ҳукуматга бугунги кунгача олиб борган иши учун миннатдорлик билдирди. Амалдаги вазирлар маҳкамаси янги ҳукумат шакллантирилгунича ишини давом эттиради», — дейилади давлат раҳбари канселярияси хабарида.
Парламентнинг янги аъзолари қасамёди 25 июнга режалаштирилган.
Эслатиб ўтамиз, Туркия бош вазири Аҳмед Давутўғлининг Адолат ва тараққиёт партияси, парламент сайловларининг дастлабки натижаларига кўра, ҳукмрон партия мақомидан айрилди. Партия фоизлар бўйича етакчилар қаторига чиқди, бироқ ҳукуматни ёлғиз шакллантириш учун парламентда етарли миқдорда ўринга эга бўла олмади. 99 фоиз бюллетенлар кўриб чиқилгач, ATП овозларнинг 40,94 фоизи ёки 550 ўринли мажлисда 259 та ўринни қўлга киритди.
Изоҳ (0)