Россия 2015 йилнинг май ойида нефть қазиб олиш ҳажми бўйича, Саудия Арабистонини ортда қолдириб, жаҳонда биринчи ўринга чиқди. RBC.ru хабарига кўра, Россия май ойида 45,288 миллион тонна нефть қазиб олган, ўртача кунлик қазиб олиш ҳажми эса 10,708 миллион баррелга тенг бўлган.
Нефть қазиб олиш кўрсаткичлари бўйича ОПЕК мамлакатлари орасида энг каттаси ҳисобланган Саудия Арабистони май ойида кунига ўртача 10,25 миллион баррель нефть қазиб олган. Бу апрелдаги кўрсаткичдан қарийб бир фоизга кам.
Аввалроқ, нефть қазиб олиш бўйича жаҳонда учинчи мамлакат ҳисобланган АҚШда суткасига 9,6 миллион баррель «қора олтин» қазиб олинаётгани, бу сўнгги йиллардаги энг юқори кўрсаткич эканлиги ҳақида хабар берилганди.
2014 йил охирида нефть нархи кескин тушиб кетганига қарамай, Россия нефть қазиб олиш ҳажмини сусайтираётгани йўқ. Қайд этиш жоиз, 2014 йил давомида бир баррель нефть нархи 110 доллардан 40 долларгача тушиб кетди, бу эса рублнинг кескин қадрсизланишига сабаб бўлди.
Изоҳ (0)