АҚШ Россия газини Европага етказиб бериш учун «Жанубий оқим» ўрнига бошқа, янги газ қувури ётқизилишига қарши чиқмоқда. Бу ҳақда, Kommersant.ru’нинг хабар беришича, Афинадаги музокаралар чоғида АҚШ давлат департаментининг халқаро энергетика масалалар бўйича махсус вакили Амос Хокстайн маълум қилган.
Греция энергетика вазири Панаётис Лафазинаснинг сўзларига кўра, Греция ҳукумати Россия газини Европага етказиб бериш бўйича лойиҳани Греция бўйлаб ўтишини тўла қўллаб-қувватлайди.
«Албатта, АҚШ бунга қарши чиқмоқда ва яқинда бўлиб ўтган учрашувимизда Хокстайн буни менга очиқчасига ва самимий равишда маълум қилди. Шунга қарамай, биз ушбу лойиҳа миллий манфаатларимизга мос, иқтисодий ва энергетик жиҳатдан фойдали деб ҳисоблаймиз», - деди грециялик вазир.
Аввалроқ Греция томони «Турк оқими» газ қувурининг бир қисми ўз ҳудудидан ўтишига қарши эмаслиги ҳақида хабарлар берилганди.
Изоҳ (0)