Airbus А400М ҳарбий-транспорт самолёти, экипаж лайнерда носозликлар кузатилаётгани ҳақида ахборот берганидан сўнг бир неча дақиқа ўтиб Испаниянинг Севилья вилоятидаги Coca-Cola заводига қулаган. Бу ҳақда RBC.ru хабар бермоқда.
El Pais’нинг хабар беришича, ҳалокатга учраган самолёт қулай об-ҳаво шароитида учаётган бўлган ва учувчиларда атрофни кўриш билан боғлиқ муаммо бўлмаган.
Испания бош вазири Мариано Рахой Airbus компаниясини авиаҳалокат юзасидан энг шаффоф суриштирув ишларини ўтказишга чақирди. Авиакомпания ҳозирча А400Мънинг қулашига сабаб бўлиши мумкин бўлган бирорта тахминни илгари сургани йўқ.
Шанба куни юз берган авиаҳалокат натижасида тўрт киши ҳалок бўлган, экипажнинг яна икки аъзоси оғир аҳволда шифохонага олиб келинган. Сўнгги маълумотларга кўра, самолёт бортида етти киши бўлган.
Самолёт Airbus Military заводида ишлаб чиқарилган ва айни вақтда синовдан ўтказилаётган эди. Аввалроқ Германия, Испания, Буюк Британия, Туркия, Бельгия ва Люксембург 180та А400Мъни сотиб олиш истагини билдирган эди, бироқ ҳозирга қадар буюртмачиларга бирорта бундай самолёт етказиб берилмаган.
Изоҳ (0)