Путин Порошенко билан газ ва Донбассга гуманитар ёрдам масалаларида келишиб олганини айтди

Россия президенти Владимир Путин Украина президенти Пётр Порошенко билан музокаралар чоғида Донецк ва Луганск вилоятларига гуманитар ёрдам бериш борасида келишувга эришилганини маълум қилди, деб ёзади «Сегодня».

«Биз Донецк ва Луганскка гуманитар ёрдам бериш зарурати ҳақида гаплашдик. Қай тарзда ҳамкорлик қилишимиз тўғрисида келишиб олдик», — дея қўшимча қилди у.

Путин шунингдек газ муаммолари бўйича консультацияларни янгилаш ҳақида ҳам битимга эришилганини айтди. «Мен ҳам, президент Порошенко ҳам энергетика, газ энергетикаси масалалари бўйича музокараларни қайта бошлаш керак деб ҳисоблаймиз», — деди у.

Нашрнинг эслатишича, аввалроқ Порошенко 6 сентябрь куни Украина, Евроиттифоқ ва Россия ўртасида энергетика масалалари бўйича навбатдаги консультациялар бўлиб ўтишини маълум қилган эди.