Дунёдаги энг баланд бўйли одам — Леонид Стадник 24 август куни Украинанинг Житомир вилоятида вафот этди, дея хабар берди УНИАН. Бўйи 2 метр 57 сантиметрга тенг бўлган 44 ёшли Стадник мияга қон қуйилишидан ўлган.
Рекордчи жамоа хўжалигида ветеринар бўлиб ишлаган, оилали бўлмаган. Стадник 12 ёшидан бошлаб бош мия гипофизининг гормон ишлаб чиқарувчи зарарсиз ўсимтасидан азоб чеккан, айнан у акромегалия — гигант бўй сабабчиси бўлган. Леонид Стадник бир нечта нейрожарроҳлик амалиётларини бошидан ўтказган, шунингдек совуқ урган товони туфайли биринчи гуруҳ ногирони бўлган.
Стадник 70-ўлчамдаги кийим-кечак ва 62-ўлчамдаги поябзал кийган, уларнинг барчаси буюртма билан тикилган. Ҳамқишлоқлари девқомат Леониднинг меҳрибон ва кўнгилчан киши бўлганини айтиб беришди.
Стадник 2008 йилда Гиннеснинг Рекордлар китоби ходимлари томонидан киритилган ўлчовлардан ўтиш таклифини рад этган, шу туфайли у расмий рекордчи ҳисобланмаган. Расман айни пайтдаги энг баланд бўйли одам туркиялик Султон Кесен деб тан олинган. Бироқ аслида Стадник ундан олти сантиметрга узунроқ бўлган.
Изоҳ (0)