Бразилиялик кекса кишини тириклайин кўмишларига оз қолди, дея хабар бермоқда Daily Mail. Гап шундаки, шифокорлар уни ўлган деб эълон қилишди ва жасадни моргга юборишди. Аъзадор қариндошлар мурдани таниш учун бу ерга келишганида, қариянинг «жасади» солинган қоп ҳаракатланаётганига гувоҳ бўлишди.
54 ёшли Валделусио Гонсалвес ошқозон саратонига йўлиқиб, даволанган. 23 август куни нафас олиши қийинлашгач, уйидагилари уни касалхонага юборишади. Эртаси куни эса унинг вафоти ҳақида хабар беришади. Беморнинг ўлимини қайд этган шифокорлар қариндошларига унинг полиорган етишмовчилигидан вафот этганини айтади. Орадан икки соат ўтиб, «марҳум»нинг укаси Сальвадор шаҳридаги морглардан бирига келади, қолган қариндошлар бу вақтда дафн маросимига тайёргарлик кўра бошлаган эди.
Бироқ моргга кириб борган Вальтерио Гонсальвес акаси ётган қопнинг нафас олганда бўладигандек, кўтарилиб-тушаётганини сезади ва докторларни чақиради, улар унинг акаси тирик эканини аниқлашади. Уни зудлик билан интенсив даволаш палатасига етказишади.
Маҳаллий соғлиқни сақлаш департаменти воқеа юзасидан тергов бошлади. Ушбу ноодатий ҳодиса содир бўлган касалхона директори бу бемор билан ишлаган шифокорлар гуруҳи орқали воқеага ойдинлик киритишга ваъда берди.
Изоҳ (0)