Отаси билан 30 кун ичида дунё бўйлаб саёҳат қилиб чиқмоқчи бўлган ўспирин енгил моторли самолёти Тинч океанига қулаб тушганида ҳалок бўлди. Бу ҳақда ABC News хабар берди.
Бортида 17 ёшли Ҳерис Сулаймон ва унинг отаси бўлган самолёт 23 июль, чоршанба куни Американинг Самоаси пойтахти Паго Паго шаҳри аэропортидан учиб кетган ва бир неча дақиқа ўтиб, океанга қулаган. Қирғоқ соқчилари ўспириннинг жасадини топишди, иккинчи йўловчини қидириш ишлари давом этмоқда.
Ота-бола ўз саёҳатини 21 июнь куни АҚШдаги Индианаполис аэропортидан бошлаган ва Ер шарини айланиб чиқиб, 30 кундан кейин қайтишни режалаштирган эди. Ҳалокатгача улар Гренландия, Қоҳира, Покистон, Шри-Ланка ва Америка Самоасига ташриф буюриб улгурган. Парвоздан тушган маблағни ўсмир йигит Покистонда мактаблар қуриш билан шуғулланувчи Citizens Foundation жамғармасига топшириш ниятида бўлган.
Ҳерис Сулаймон дунё бўйлаб саёҳат қилган энг ёш учувчига айланиши мумкин эди. Ҳалокат сабаблари ўрганилмоқда.
Изоҳ (0)