Otasi bilan 30 kun ichida dunyo bo‘ylab sayohat qilib chiqmoqchi bo‘lgan o‘spirin yengil motorli samolyoti Tinch okeaniga qulab tushganida halok bo‘ldi. Bu haqda ABC News xabar berdi.
Bortida 17 yoshli Heris Sulaymon va uning otasi bo‘lgan samolyot 23-iyul, chorshanba kuni Amerikaning Samoasi poytaxti Pago Pago shahri aeroportidan uchib ketgan va bir necha daqiqa o‘tib, okeanga qulagan. Qirg‘oq soqchilari o‘spirinning jasadini topishdi, ikkinchi yo‘lovchini qidirish ishlari davom etmoqda.
Ota-bola o‘z sayohatini 21-iyun kuni AQShdagi Indianapolis aeroportidan boshlagan va Yer sharini aylanib chiqib, 30 kundan keyin qaytishni rejalashtirgan edi. Halokatgacha ular Grenlandiya, Qohira, Pokiston, Shri-Lanka va Amerika Samoasiga tashrif buyurib ulgurgan. Parvozdan tushgan mablag‘ni o‘smir yigit Pokistonda maktablar qurish bilan shug‘ullanuvchi Citizens Foundation jamg‘armasiga topshirish niyatida bo‘lgan.
Heris Sulaymon dunyo bo‘ylab sayohat qilgan eng yosh uchuvchiga aylanishi mumkin edi. Halokat sabablari o‘rganilmoqda.
Izoh (0)