Ўлимга маҳкум этилган АҚШ фуқароси Жозеф Вуд Аризона штатидаги қамоқхонада ўлим инъекцияси берилганидан икки соат ўтибгина вафот этди. Бу ҳақда Reuters’га таяниб «РИА Новости» хабар берди.
Маҳбуснинг адвокати Дейл Бейч сўзларига кўра, Вуд бир соат-у қирқ дақиқа давомида оғзи билан ҳаво ютган ва нафаси сиқилган.
1989 йилда севган қизи ва унинг отасини ўлдиргани учун судланган 55 ёшли Вудни қатл қилиш жараёни маҳаллий вақт билан 13:52 да бошланган. 15:49 дагина у ўлган деб қайд этилган. Шу вақт ичида унинг адвокатлари ариза орқали жараённи тўхтатиш ва заҳарга қарши дори беришга эришмоқчи бўлишди.
Аризада маҳбуснинг оғриқсиз қатл бўйича конституцион ҳуқуқи бузилгани ҳам қўшимча қилинди.
Аризона штати губернатори Жен Брюер тегишли органларга тўлиқ текширув ўтказишни буюрди, бироқ у қатл жараёни адолатли ва қонуний ўтганини таъкидлади.
«Гувоҳлар ва тиббий кўрсаткичлар маҳбус ўлимидан аввал азоб чеккани ҳақида гумон қилишга асос бермайди», — деди у.
Изоҳ (0)