Sirdaryo viloyati Guliston shahri uchun 12 dona yangi avtobus olib kelindi. Bu haqda Transport vazirligi xabar berdi.
Qayd etilishicha, davlat rahbarining 2023-yil 16-fevraldagi “Jamoat transporti tizimini isloh qilish chora-tadbirlari to‘g‘risida”gi qarorida belgilangan vazifalar ijrosi doirasida Guliston shahrida aholiga sifatli jamoat transporti xizmati ko‘rsatishni yo‘lga qo‘yish maqsadida zamonaviy avtobuslari olib kelinishi davom etmoqda.
2024-yilda Sirdaryo viloyatiga XXR ishlab chiqarilgan zamonaviy turdagi 8 dona Yutong rusumli avtobuslar olib kelinib, Guliston shahar yo‘nalishlariga joylashtirilgan edi. Jamoat transporti parkini yangilash borasidagi ishlar doirasida “Trans Imkon Servis” MCHJ tomonidan XXR ishlab chiqarilgan 12 dona Zhong Tong rusumli shahar tipidagi avtobuslar olib kelindi.
Olib kelingan yangi avtobuslar Guliston shahridagi yo‘nalishlarda faoliyat ko‘rsatayotgan Isuzu rusumli avtobuslar o‘rniga joylashtirilib, shahar aholisi va tashrif buyuruvchi mehmonlarga transport xizmatlari ko‘rsatilishi rejalashtirilgan.
Shuningdek, “Guliston-Terminal” MCHJ tomonidan 8 dona yangi Zhong Tong rusumli avtobuslar xarid qilish bo‘yicha kelishuv shartnomalari tuzildi. Boshqa mahalliy tadbirkorlar tomonidan ham yangi zamonaviy avtobuslar xarid qilish bo‘yicha zaruriy ishlar amalga oshirilmoqda.
Umumiy hisobda Guliston shahridagi jamoat transportlari uchun jami 65 dona yangi avtobuslar xarid qilishi rejalashtirilgan.
Bundan avval Angrenga 15 ta Yutong avtobusi olib kelingandi. Zoir Mirzayev 2024-yil oktyabrida o‘tkazgan hokimlik soatida Toshkent viloyatida transport sohasidagi xizmatlarni yaxshilash uchun 1000 ta yangi avtobus xarid qilish bo‘yicha topshiriq bergandi.
Transport vazirligi matbuot xizmatining bildirishicha, hududlarda aholiga ko‘rsatilayotgan transport xizmatlari sifatini yaxshilash maqsadida zamonaviy avtobuslarni olib kelish ishlari davom etmoqda. Toshkent shahriga yana 1000 ta Yutong avtobusini olib kelish imkoniyatlari o‘rganilmoqda. Andijon viloyatiga Xitoydan 100 ta elektrobus xarid qilinishi rejalashtirilgan.
Izoh (0)