Suriya hukumati mudofaa qobiliyatini mustahkamlash va terrorizmga, jumladan, ISHID guruhiga qarshi kurashda Turkiyadan yordam so‘radi. Bu haqda TRT Haber telekanali Turkiya Mudofaa vazirligidagi manbalarga tayanib xabar berdi.
“Suriya ma’muriyati mudofaa qobiliyatini mustahkamlash va ISHID boshchiligidagi terrorchilik tashkilotlariga qarshi kurash doirasida Turkiyadan rasmiy yordam so‘radi. Biz, Suriyaning mudofaa qobiliyatini mustahkamlash bo‘yicha sa’y-harakatlarimizni davom ettirmoqdamiz”, deya ta’kidlagan manbalar.
Harbiy idora Turkiyaning qo‘shni davlat yaxlitligini himoya qilishini ta’kidlagan.
“Turkiya Suriyaning hududiy yaxlitligini himoya qilish, unda barqarorlikni ta’minlash va terrorchilik tashkilotlariga qarshi kurashish masalalarida qat’iy pozitsiyasini saqlab qolmoqda”, deyiladi Mudofaa vazirligi bayonotida.
Turkiya tashqi ishlar vaziri Hakan Fidan avvalroq mamlakatining Suriyani beqarorlashtirish va parchalash rejalarini amalga oshirishga yo‘l qo‘ymasligini aytgan.
13-iyul kuni Suvayda viloyatida arab qabilalaridan bo‘lgan ko‘ngillilar va tog‘lik druzlarning o‘zini o‘zi mudofaa qilish kuchlari o‘rtasida to‘qnashuvlar sodir bo‘ldi. 15-iyul kuni Suriya IIV va Mudofaa vazirligi maxsus bo‘linmalari viloyatning shu nomdagi ma’muriy markaziga kirib, vaziyatni barqarorlashtirish maqsadida uni tozalashni boshladi. Ko‘p o‘tmay Isroil Suriya qurolli kuchlari kolonnalariga zarba bera boshladi va buni druz aholisini himoya qilish istagi bilan izohladi, 16-iyul kuni esa Damashqdagi bir nechta strategik obyektlarni o‘qqa tutdi.
Suriya prezidenti Ahmad ash-Shar’a 19-iyul kuni xalqaro vositachilar ishtirokida ishlab chiqilgan tinchlik rejasiga muvofiq, janubiy Suvayda viloyatida o‘t ochishni to‘xtatish rejimi joriy etilishini e’lon qilgan. AQShning Suriya bo‘yicha maxsus vakili Tom Barrak ertasi kuni arab respublikasi va Isroil o‘rtasidagi sulh kuchga kirganini ma’lum qildi.
Izoh (0)